NPA mikanta, 18-kilos IED narekober
KIDAPAWAN CITY — Narekober sa mga sundalo ang gilubong nga bomba sa mga terorista alas 2 sa hapon, Martes, Disyembre 21 sa probinsya sa Cotabato.
Sa taho gikan sa 72nd Infantry Battalion Philippine Army nga nakadawat sila og impormasyon sa gilubong nga mga Improvised Explosive Device (IED) o landmine sa utlanan nga bahin sa Arakan Cotabato ug sa Marilog District Davao City.
Giadtuan dayon kini sa mga sundalo uban si alyas Kumander Amy Awi sa New Peoples Army (NPA) diin gikalot sa puwersa sa 72nd IB ang dapit nga gitudlo ni Awi nga gilubngan sa mga bomba.
Nakuha sa mga sundalo ang 18-kilos nga IED o landmine ug uban pa nga mga war materials.
Mismong si Kumander Amy Awi nga kanhi NPA nga misurender sa militar ang naghatag og impormasyon sa gipanglubong nilang mga bomba.
Ang mga IED ang gipanag-iyahan sa Pulang Bagani Command sa NPA nga kanhi gipangulohan sa napatay nga si Kumander Parago.
Kahinumdoman nga daghanan na nga mga NPA ang mibalik sa sabakan sa balaod sa North Cotabato gumikan sa maayo nga programa sa gobyerno sa mga kanhing walhong grupo nga nakadesisyon nga manginabuhing magmalinawon. Edgar Fuerzas
