Inahan, amahan ug anak patay sa kuryente
Ni Jeepy P. Compio
TAGUM CITY — Patay ang mag-live in partner ug ang anak niini nga 13-anyos human ilang nagunitang ang live wire sa kuryente alas 5 sa hapon niadtong Dominggo didto sa Purok 5 Cabugan, Barangay Busaon ning siyudad.
Sa report gikan sa Police Regional Office (PRO)-Davao pinaagi sa Tagum City Police Station nga sakay sa motorsiklo ang mga biktima nga sila Ronaldo Capangpangan Gabucan, 45; Antonina Orello Sasil, 45; ug ang anak nga si Ray Ann Sasil Gabucan, 13-anyos.
Nasayran nga samtang pauli na unta sila, naay mibabag sa ilang agianan nga wire maong gigunitan kini ni Ronaldo ug kalit silang mikirig.
Giingon sa kapulisan nga main line ang maong live wire sa Northern Davao Electric Cooperative (Nordeco) Inc.
Sa bahin sa maong electric cooperative, matag adlaw sila nga gasubay sa ilang mga linya aron luwas ang katawhan, apan niadtong higayona, maoy pagkaputol sa wire tungod sa hangin nga hinungaw sa Bagyong Odette.
Tungod sa hitabo, nagpaabot og pahasubo ang Nordeco sa mga kabanay sa mga biktima.
“Nordeco expresses its sincerest sympathy to the families of Ronaldo Gabucan, Antonina Sasil and Ray Ann Gabucan who unfortunately lost their lives in an electrocution accident involving its line. The Electric Cooperative assures necessary assistance to the bereaved family and prays for the repose of their souls,” pahayag sa Nordeco.
Nakig-alayon na sab ang sa Nordeco sa pamilya ug mipasalig sa tabang nga ipaabot sa maong electric cooperative ngadto kanila.
Ang mga patay’ng lawas sa mga biktima gidala sa Tagum Coop Funicare.
