Basurero gipatay
Ni Edgar Fuerzas
COTABATO CITY — Bugto ang kinabuhi sa usa ka basurero sa pagpamusil alas 4:50 sa kaadlawon, Martes, Disyembre 21, sa siyudad.
Giila ang biktima nga si Mohammad Ali, 37-anyos, minyo ug molupyo sa Barangay Salimbao, Sultan Kudarat, Maguindanao.
Matud ni Cotabato City Police Director Colonel Rommel Javier nga samtang nangukay og basura ang biktima sa Notre Dame Avenue sa Barangay Rosary Heights 2 sa dakbayan, kalit lang mibutho ang duha ka wala mailhing tawo ug gipusil kini gamit ang kalibre.45 nga pistola.
Abtik sab nga miikyas ang mga suspetsado sakay sa motorsiklo paingon sa hilit nga dapit sa siyudad.
Patay on the spot si Ali nga naka-angkon og samad pinusilan sa iyang ulo lakip na sa likod.
Ang biktima ang matag adlaw na nga namasura sa dakbayan nga iya sab nga ibaligya nga maoy iyang gibuhi sa pamilya niini.
Sa kasamtangan, ang kapulisan sa Cotabato City ang padayon nga nag-imbestiga sa pagpamusil-patay sa biktima.
