Soccsksargen natala ang zero Covid-related deaths
Ni Edgar Fuerzas
KIDAPAWAN CITY — Wala nay natala nga bag-ong namatay sa Covid-19 sa Soccsksargen region sulod na sa lima ka adlaw.
Kini ang pinaka-ulahing taho sa Department of Health (DOH)-Soccsksargen gikan Disyembre 16 hangtud 20.
Nagpabilin sa 2,254 ang Covid-19 related deaths sa rehiyon o 3.95 percent sa kinabuk-ang 57,027 nga mga kaso.
Nadungagan sab sa walo nga bag-ong kaso sa kagaw sa Rehiyon 12 nga misaka na sa 264 nga aktibo sa Covid-19.
Nanguna sa mga active cases ang South Cotabato nga dunay 102, gisundan sa General Santos City – 66, Sarangani – 49, North Cotabato – 45, ug Sultan Kudarat – 2.
Misaka sab sa 54,491 ang recoveries sa sakit human nadugang ang 15 ka pasyente nga naayo.
Ang recovery rate sa Rehiyon 12 ang anaa sa 95.55 percent.
Bisan pa sa pagkunhod sa mga kaso sa Covid-19 sa Soccsksargen, ang DOH padayon nga nanawagan sa mga lungsuranon nga dili mokompyansa ug sundon ang minimum health protocols.
