1.1M na ‘fully vaxxed’ sa Soccsksargen
Ni Edgar E. Fuerzas
KIDAPAWAN CITY — Miubos na ang ihap sa mga nagpostibo sa coronavirus disease 2019 (Covid-19) sa Soccsksargen ug gituohan nga tungod kini kay daghan nang mga indibiduwal ang fully vaccinated na sa rehiyon nga moabot og 32.57 percent sa target nga 3,490,115.
Matud ni Director Edvir Jane Montañer, immunization program coordinator sa Department of Health (DOH)-Soccsksargen, nga moabot na sa 1,136,797 ang nabakunahan sa rehiyon.
Hinuon, sumala sa opisyal nga ubos kaayo kini kung itandi sa target nga 70 percent aron maabot ang herd immunity.
Gumikan sa Bayanihan Bakunahan national vaccination days niadtong Nobyembre 29 hangtud Disyembre, moabot na sa 1,926,633 ka mga indibiduwal ang partially vaccinated o 55.20 percent sa target population.
Subling ipahigayon ang Bayanihan Bakunahan Part II sa Soccsksargen sugod karong adlawa, Disyembre 20, hangtud sa Disyembre 22.
Hugot pa gihapon gipatuman sa rehiyon ang minimum health protocols batok Covid-19.
