Balay-Balay, Tubig-Tubig: Pagbiya ni Papa
Dear Atty. Joan,
Hello Atty. Joan ug hinaot nga nagpabilin kang luwas bisan pa man sa pandemiya. Salamat sa kanunay nga paghatag og tambag sa mga nanginahanglan.
Ako diay si Donna, usa ka magtutudlo. Ang akong isugilon kanimo kabahin sa sitwasyon sa akong amigo nga dili lang nako nganlan.
Duna siyay kapuyo nga babaye ug kapin upat (4) ka tuig na sila nga nag-uban sulod sa usa ka panimalay. Duha ka bata nga nagpangedaron og kwatro (4) ug dos (2) anyos ang bunga sa ilang pagtipon. Hangtod karon, wala nagminyo ang akong migo ug iyang kapuyo.
Tungod kay dili na sila magkasinabot sa iyang kapuyo, misigon kanako ang akong higala nga tinguha niya nga mubiya sa ilang pinuy-anan. Hinuon, uyon ra siya nga mohatag og sustento sa mga bata.
Nasayod na sad ang iyang kapuyo sa iyang plano, apan midemanda kini nga muhatag og diyes mil pesos (P10,000) matag buwan. Nagtrabaho lang ang akong migo isip usa ka bank teller ug dili kaayo dako ang suholan ini. Matod pa sa kapuyo niya, iya daw nga ikiha ang iyang bana kon dili kini muhatag sa maong sustento. Gani, mahimo kuno nga ipapriso ang akong migo mahitungod niini.
Tinuod ba gayod nga mabilanggo ang akong migo kon mapamatud-an nga wala kini maghatag og sustento? Duna pa ba siyay katungod sa mga bata? Unsa kahay angay buhaton niya?
Hinaot nga mahatagan ninyo og katin-awan ang maong sitwasyon. Salamat ug padayon kamo sa inyong adbokasiya.
Imong magtatampo,
Donna
Dear Donna,
Una sa tanan maayong adlaw kanimo Donna ug salamat sa imong pagsunod niining lindog.
Dili sakto ang panglantaw sa kapuyo sa imong migo nga ipadakop siya kon dili mutuman sa iyang gipangayo nga binulan nga sustento nga mokantidad og P10,000. Kini tungod kay ang pagsuporta sa ginikanan sa iyang anak mag-agad sab kon pila ang kita ini. Dunay basehan sa balaod ug mga desisyon sa Korte Suprema ang pagtugot sa paghatag og suporta sa mga anak subay sa abilidad sa ginikanan.
Apan dili kini nagpasabot nga dili na muhatag ang imong migo og sustento sa mga bata kon mobiya kini kanila. Angay hinumduman nga ang kapakyas sa paghatag og suporta sa mga bata usa ka porma sa economic abuse nga gisilotan ubos sa Anti-Violence Against Women and Their Children Act ug usa sab ni ka kalapasan sa Child Abuse Law.
Tambag nako mao ang padayon nga paghatag og abag pinansyal alang sa mga bata subay sa mga panginahanglan sa bata ug iyang abilidad sa paghatag og sustento paglikay nga mareklamo atubangan sa husgado.
Isip ginikanan sa mga bata, mahimo gihapon niya nga mabisita ang mga bata bisan pa man nga migawas na kini sa ilang pinuy-anan isip usa sa mga katungod sa illegitimate parent.
Kahinumduman nga makonsiderar lang nga ilehitimo ang mga bata tungod kay natawo ang mga bata nga wala nagminyo ang mga ginikanan. Angay sab nga maklaro sa imong migo nga ang inahan maoy dunay parental authority sa mga bata subay sa balaod ug angay nga respetaran niya ang maong kamatuoran.
Daghang salamat sa imong sulat tampo Donna ug hinaot nga makatabang ang maong tambag sa sunod nga mga lakang nga himoon sa imong higala.
Imong alagad,
Atty. Joan
[Lindog sinuwat ni Atty Joan Saniel-Amit, Executive Director inubanan sa mga abogado sa Children’s Legal Bureau sama nilang Atty. Jenny Cabradilla, Atty. Stephanie Tan ug Atty. King Perez. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]
