Nag overprice pasilutan ni Rama; business permit ipa ikanselar - SunStar

Nag overprice pasilutan ni Rama; business permit ipa ikanselar

by Philip A Cerjano

Nagpa-overpriced ka sa imong baligya nga gasolina, bugas, tubig, kandila ug ubang batakang palaliton human niigo si bagyong Odette sa dakbayan sa Sugbo?

Kon imo kanang gibuhat, nameligro ang imong business establishment nga masirad-an gumikan sa salaod nga imong nahimo.

Sa usa ka post ni Atty. Juril Patiño, brodkaster ug komentarista sa Brigada News Fm, nagkanayon nga “Cebu City LGU palihug kog hatag og aksyon sa mga gasolinahan ug water refilling station dinhi sa dakbayan , grabe na ang pagpasaka sa presyo sa gasolina ug tubig! Ayaw na mo paabot naay moreport. Pagsugod namog inspeksyon!”

Niini, si Mayor Michael Rama nibahad ngadto sa mga mapahimuslanon sa higayon nga kanselahon sa Cebu City Government ang ilang business permit kon mapamatud-an nga sila sad-an.

“On the part sa Cebu City Government, (we) will close business, revoke (the business permit),” padayag ni Rama.

“The City will apply the full force of the law. These greedy traders do not deserve to do business in Cebu City,” dugang niya.

Apan ang mayor nagkanayon nga hatagan sa Cebu City Legal Office og due process ang mga business establishment nga maoy mahimong sentro sa kontrobersiya.

PRAYORIDAD

Samtang sa pikas nga bahin, si Rama niawhag sa mga tagdumala sa gasoline station sa dakbayan nga hatagan og prayoridad sa pagpatubil ang mga sakyanan gikan sa Visayan Electric ug ilang sub-contractors.

Ang mga vehicle gikan sa National Grid Corporation of the Philippines ug ilang mga sub-contractors ug ang Davao Lights & Power Corporation.

Mao sab ang sakyanan nga gipanag-iya sa telecommunication companies, Metro Cebu Water District ug ilang mga sub-contractors, vehicles sa Cebu City Government ug Bureau of Fire Protection sanglit silang tanan maoy naglangkob sa dinaliang pagbangon sa Sugbo gikan sa pagkahagba tungod sa bagyo.

Ang Sugbo nagping-it karon sa kalisod tungod kay way supply sa kuryente nga nisangko sa kakuwang sa pagkaon ug tubig.

Daghan sa mga balay patigayon ang nagsalig lang sa generator sets.

Daghan usab sa mga gas station ang wa makaabli tungod kay way generator set hinungdan nga tag-as ang linya sa mga sakyanan nga nakapahinay sa dagan sa trapiko.

Sa paghibalik sa supply sa kuryente, ang mao nga mga problema masulbad na.

Leave a Reply

Your email address will not be published.