Editoryal: Mas sakit pa ni Odette - SunStar

Editoryal: Mas sakit pa ni Odette

Grabe ang kapait nga giantos sa mga Sugboanon ingon man sa mga lumolupyo sa ubang mga dapit sa Kabisay-an ug Northern Mindanao nga naigo og maayo sa bagyong Odette. Kadaghanan ngitngit ang Pasko kay way kuryente. Ang pait wa pay supply sa tubig hinungdan nga magsiril siril sa pagpangita.

Bisan sa pagpaneguro sa mga oil company nga dunay igong supply sa lana, taas gihapon ang linya sa mga gas station tungod kay kanunay mahutdan. Naa na man tuoy nakagasolina, ang ubang stations nahutdan na sab hinungdan sa taas nga linya gikan sa sayo sa buntag hangtod sa lawom nang gabii.

Pait nga huna-hunaon nga nagkagamay na unta ang mga kaso sa coronavirus disease 2019 (Covid-19), ma-enjoy na unta ang lugak nga quarantine, apan nia karon ang grabeng epekto ni Odette.

Apan dunay mas nag-antos pa nga mga tawo. Una, ang mga pamilyang namatyan ug sakop sa pag-igo ni Odette, sama sa usa ka pamilya sa dakbayan sa Mandaue nga namatyan og anak ug asawa human madat-ogi og firewall.

Daghan pa ang nangamatay tungod sa bagyo kay nadat-ugan sa kahoy ug ubang bug-at nga mga butang.

Di pa igo, dunay pang nangasunogan sa Dakbayan sa Sugbo ug Mandaue. Samot ang kapait nga ilang nahiaguman.

Kon ikaw wa maigo sa sunog, wa ka mamatyi og kabanay, wa maguba sa hingpit ang balay kay nakaangkon lang og gamay nga kadaut, angay kang magpasalamat sa Diyos nga ang kakuwang lang sa tubig ug kangitngit sa kagabhion ang imong giantos.

Di lalim ang masunogan og balay taliwa sa epekto sa bagyo. Nihit pang tubig, wa ka pay kapuy-an.

O kaha magsaulog sa Pasko nga wa diha nimo ikauban ang minahal mo sa kinabuhi. Di mo na makita bisan kanus-a. Mas lisod ug mas sakit ni kay sa epekto ni Odette.

Leave a Reply

Your email address will not be published.