Van nahulog sa pangpang 10 titser, 1 drayber angol
KIDAPAWAN CITY – Naangol ang napulo ka magtutudlo ug ang drayber sa nadisgrasya nga van alas 2:15 sa hapon, Biyernes, Disyembre 24 sa probinsya sa Cotabato.
Ang mga biktima mga magtutudlo sa Cotabato State University sa Cotabato City.
Gibutyag ni Alamada Chief of Police Major Bryan Espinoza nga sakay ang mga biktima sa usa ka D4D van gikan sa Bukidnon pauli na sa Cotabato City, apan pag-abot nila sa dulhugon nga kalsada sa Barangay Barangiran, sa Alamada kalit lang nawad-an og preno ang van hinungdan nga wala na makontrola sa drayber.
Diretso nga nahulog sa bung-aw kilid sa kalsada ang van ug gidaro niini ang usa ka balay.
Nakadagan ang mga namuyo sa balay ug naluwas samtang napulo ka magtutudlo ang naangol lakip na ang drayber.
Ang mga biktima abtik nga gitabangan sa mga namuyo sa Barangay Barangiran ug dali silang gipangdala sa Alamada District Hospital diin luwas na sa makuyaw nga kahimtang.
Kahinumdoman nga daghanan na ang namatay ug naangol nga nadisgrasya sa Barangay Barangiran sa Alamada.
Nagpasidaan ang Alamada PNP sa muagi sa maong dapit nga mag-amping ug maghinay-hinay sa pagmaneho. Edgar Fuerzas
