60 lineman boluntaryo mibalik sa linya sa kuryente nga naigo sa Bagyong Odette - SunStar

60 lineman boluntaryo mibalik sa linya sa kuryente nga naigo sa Bagyong Odette

Ni Jeepy P. Compio

SAYSENTA ka mga lineman gikan sa pito ka mga electric cooperatives sa Mindanao ang miadto sa mga lugar nga gikuso-kuso sa Bagyong Odette aron motabang sa pagbalik sa mga linya sa kuryente.

Kagahapon sa kaadlawon, Disyembre 21, mibiya ang 60 ka mga Warriors of Light nga kabahin sa Task Force Kapatid padung sa Dinagat Island, Siargao Island ug sa Surigao del Norte.

Sa Disyembre 24, adlaw sa Pasko, napili niining 60 ka mga lineman nga di makauban ang ilang mga pamilya sanglit ilang gihatag ang ilang oras sa mga naigo sa bagyo aron mahibalik sa hinanaling panahon ang linya sa kuryente.

Uban ang kusog sa mga electric cooperatives gikan sa Northern Davao Electric Cooperative (Nordeco) Inc., South Cotabato Electric Cooperative (Socoteco 1&2), Davao Oriental Electric Cooperative (Doreco), Davao del Sur Electric Cooperative (Dasureco), Sultan Kudarat Electric Cooperative (Sukelco) ug Cotabato Electric Cooperative (Cotelco) nahimo nila ilang tradisyon diha sa pagtinabangay panahon sa kalamidad.

Ang mga Warriors of Light dili lamang nagtabang sa pagpabarog sa linya sa kuryente apan lakip ang pagpabarog sa pagtuo nga adunay mahayag nga kaugmaon hilabi na nga ang mga Electric Cooperatives nagkahugpong sa pagkab-ot sa kalamboan.

Leave a Reply

Your email address will not be published.