Presyo sa isda mosulbong
By Iona Finlay C. Mendoza
MGA konsumante molaum sa pagsaka sa presyo sa mga isda tungod sa nagpadayon nga “off-season” nga molungtad pa sa sayong bahin sa 2022.
Gisulti ni Bureau of Fisheries and Aquatic Resources-Davao (BFAR-Davao) Regional Director Raul Millana nga ang Nobyembre hangtud Pebrero mao ang kasagaran nga “lean month” sa mga isda nga maoy hinungdan sa di managsamang presyo sa mga isda sa merkado.
“Naa man tay sufficient supply pero ang iyang presyo mag-vary gyud tungod sa atong off-season karon,” pagklaro ni Millana.
Bisan tuod kon ang suggested retail price (SRP) wala pa gipatuman sa merkado, gikanayon ni Millana nga kini ang maghiusa sa presyo ug magkontrola sa pagsaka niini.
Sumala niya, ang kasamtangang presyo sa isda sa merkado kasagaran maglahi base sa mga presyo nga gitakda sa mga “consolidators.”
“Mas maayo unta kung naay SRP kay kung gikan gyud sa source mismo, naay SRP didto at least kontrolado ang presyo,” matud niya.
Dugang pa niini, gisulti sa regional director nga ang kahimtang sab sa panahon moduwa og papel sa “off-season,” apil na ang mga mananagat kinsa nagpahulay sa pagpanagat tungod sa kapaskohan ug mag-atiman sab sa ilang mga sakayan ug mga kahimanan.
Gibutyag ni Millana nga ang bugnaw nga panahon sa off-season nagpasabot nga ang pagtubo sa mga isda mohinay sab samtang ang wild saltwater nga mga isda molalin ngadto sa mas “warmer” nga mga lugar hangtud ang klima mahimong “conducive” na sab alang sa ilang habitat, nga moresulta sa limitado nga suplay.
“Mora pud ni siya og lean month kay panahon sa bugnaw, labi sa aquaculture, ang atong isda, hinay ang growth rate kay hinay mokaon kay tugnaw ang panahon,” pagklaro ni Millana.
Tungod niini, gisulti ni Millana nga ang Department of Agriculture nagtugot sa pag-importar tungod sa panginahanglan atol ning maong panahon aron nga ibalanse ang suplay ug mga presyo sa merkado.
“Gi-allow niya ang import of necessity na pwede ta moangkat sa ubang nasud kadtong mga isda nga puwede dal-on diri pero limited ang volume.”
Apan gipaneguro ni Millana nga sa sayong bahin sunod tuig ang kalihukan sa pangisda mobalik na sa normal.
