Kawata’g motor misukol sa mga pulis, patay
Ni Edgar Fuerzas
TACURONG CITY — Tikangkang ang usa ka kawatan og motor nga misukol sa mga pulis alas 3 sa hapon, niadtong Dominggo, Disyembre 19, sa probinsya sa Sultan Kudarat.
Giila ang napatay nga si Sabahuddin Maton nga molupyo sa Ampatuan, Maguindanao.
Gibutyag ni Esperanza Chief of Police Major Alexander De Pedro nga nasiplatan nila ang suspek nga sakay sa motorsiklo nga paagi sa police checkpoint sa Barangay Panay Esperanza, Sultan Kudarat.
Gipahunong si Maton sa mga pulis apan mipaturatoy siya sa pagpadagan sa gisakyan niini nga motor.
Gigukod ang suspek ug nagpabuto sa iyang armas resulta nga mibalos ang mga pulis.
Patay on the spot si Maton nga natikangkang uban ang iyang motor daplin sa kalsada nga naka-angkon sa daghang samad pinusilan.
Nalambigit ang suspek sa daghanan nga motornapping incident sa Esperanza ug dugay na nga gipanid-an sa mga pulis.
Narekober sa posisyon ni Maton ang usa ka kalibre .45 nga pistola, mga bala, duha ka magasin ug usa ka pakite sa shabu.
Sa kasamtangan, padayon nga gipangita sa kapulisan sa Esperanza Sultan Kudarat ang mga kauban sa suspek nga padayon pang naghimo sa pagpangawat og motorsiklo.
