Bohol girumbo sa tabang
Ni Ralph Lawrence G. Llemit
NAGPADALA ang lokal nga panggamhanan sa siyudad sa Davao og delegasyon niini nga gilangkuban sa rescue ug medical teams aron nga moabag sa “relief and rescue” operations sa mga naapektuhan sa Bagyong Odette sa Bohol.
Sa Facebook post, ang lokal nga panggamhanan sa Davao, pangulohan ni Mayor Sara Duterte-Carpio, nagpadala og mga personahe gikan sa City Health Office, Emergency Medical Services (EMS) sa Davao City Central 911 (EMS), Urban Search and Rescue (USAR), Fire Auxiliary Services (FAS), mga doktor gikan sa Southern Philippines Medical Center, ug social workers gikan sa City Social Welfare and Development Office (CSWDO) kagahapon sa buntag, Dominggo, Disyembre 19.
Ang delegasyon mopadulong sa Ubay, Bohol aron nga moabag sa response operations sa mga naapektuhan sa bagyo.
Sa lahi nga Facebook post, gisulti ni Duterte-Carpio nga moabot sa 106 ka personahe mitubag sa panawagan sa Bohol alang sa dugang mga tawo nga moabag.
“Mga doctors, social workers at rescue personnel ang tumugon sa tawag ng isang opisyal ng Bohol para dagdag tao na makaresponde sa mga biktima ng Odette,” sulti sa mayor.
Dugang pa niya nga gibutyag nga ang siyudad nihatag sab og “good assistance” sama sa tubig ug bugas.
Sumala sa National Disaster Risk Reduction and Management Council (NDRRMC) kagahapon nga 181,500 ka pamilya nga nagpuyo sa 2,209 ka barangay naapektuhan sa Odette nga dunay internasyonal nga ngalan nga Rai.
Sa katikaran nga gipagawas sa alas 10 sa buntag, ang NDRRMC nagsulti nga ang mga nahisgutang barangay nahimutang sa Mimaropa, Regions 5 (Bicol), 6 (Western Visayas), 8 (Eastern Visayas), 10 (Northern Mindanao), 11 (Davao), 12 (Soccsksargen), 13 (Caraga), ug sa Bangsamoro Autonomous Region in Muslim Mindanao (Barmm).
Gikanayon nga 2,861 ka mga evacuation centers nagtabang sa 107,816 ka pamilya o 427,903 ka mga indibiduwal kon diin ang uban nipuyo sa ilang mga paryente ug higala.
Sukad kagahapon Dominggo, gitaho sa NDRRMC nga duna nay upat ang kompirmadong namatay tungod sa “Odette” samtang lain pang 27 padayon pang gibalidar.
Gikompirma sab sa national council ang mga taho sa tulo ka mga tawo nga naangol ug laing usa ang nawala.
Gikanayon sab sa NDRRMC nga 135 ka lugar sa Mimaropa, Regions 7, 8, 10, ug Barmm nakasinati pa og pagkaputol sa ilang komunikasyon.
Nagbilin ang “Odette” og 3,612 ka partially damaged ug 171 totally damaged nga mga balay sa Mimaropa, Western Visayas, Northern Mindanao, Davao Region, Caraga, ug sa Barmm. (Uban sa taho sa SunStar Philippines)
