Paskong Jasenyo, gidalit alang sa mga frontliners
Ni Jeepy P. Compio
JOSE ABAD SANTOS, Davao Occidental — Subling midan-ag ang kahayag sa Pasko sa palibot sa munisipyo sa Jose Abad Santos sa Davao Occidental niadtong Biyernes, Disyembre 17, sa ilang tinuig nga Paskong Jasenyo.
Sumala ni Jose Abad Santos Mayor Jason John Joyce, ang nasampit nga selebrasyon karong tuiga ilang gipahinungod sa mga frontliners sa padayon niining pakigbugno sa bahad sa Covid-19.
“Malapit ng magdadalawang taon na nakikipaglaban ang ating mga frontliners para gawing safe ang ating community, kaya naman ang Paskong Jasenyo nitong taon ay inialay natin ito sa kanila,” ingon ni Joyce.
Sa ilang parke makita ang Giant Christmas Tree, Tunnel of Lights, replica sa Eye of London, Eiffel Tower ug daghan pa.
Sa programa, kauban ni Mayor Joyce ang kapulisan ug ang mga kadagkoan sa mga department sa munisipyo diin nagpahigayon sila og candle lighting atol sa pormal nga pagpasiga sa mga suga.
Matag gabii, gidayo sa mga residente ug bisan sa mga lokal nga turista ang kaanyag sa palibot sa munisipyo nga napuno sa mga suga nga simbolo sa Pasko.
Luyo niini, gipahinumdoman sa otoridad ang mga manuroy sa palibot sa munisipyo alang sa pagpahulagway ug paglulinghayaw nga di kalimtan ang pagsuot og face mask.
