Kabit, asawa gipapriso sa bana
Ni Dexter T. Visitacion
DAVAO DE ORO – Daw ingon sa nahunlak ang kalibutan sa usa ka bana dihang iyang naapsan ang iyang asawa nga dunay laing bathala sud sa usa ka boarding house alas 7:30 sa gabii, Disyembre 24 didto sa Purok 8, Brgy. Poblacion, Compostela.
Usa ka Ricardo (bansagon gitago) 38-anyos, minero ug nagpuyo sa Purok 1-A Barangay Sta Emelia, Veruela , Agusan del Sur ang midangat sa Compostela Municipal Police Station ug nangayo’g pakitabang sa mga pulis kay iyang ipadakop ang iyang maluibon nga asawa ug ang kabit niini.
Dihang kauban na sa reklamante ang mga pulis, ilang girumbo ang boarding house nga giabangan sa mga nahisgutan diin sa pagtugot sa caretaker nga sila makasulod ilang naabtan ang duruha nga anaa sa usa ka lawak.
Imbes magmaya si Ricardo sa adlaw sa Pasko, gisugat kini sa kapungot ug kahiubos sa iyang asawa ug sa lalaki.
Wala na sab gisaysay ni Ricardo ug sa asawa unsay hinungdan nga nagluib ang babaye, diin miuban nalang sila sa pulis.
Pag-abot sa presinto, gipaslak sa prisohan ang babaye ug ang kabit niini diin ang bana pursigido gayod nga mopasaka og reklamo batok sa mga nahisgutan didto sa korte.
