Tanang partido sa bangga sa Naga sa Enero 14 sad-an

Nadiskubrehan sa Land Transportation Office (LTO) 7 nga dunay mga kalapasan ang tanang partido nga nalambigit sa fatal accident nga nahitabo sa Barangay Poblacion, dakbayan sa Naga niadtong Enero 14, 2022.

Sa report nga gisumitir sa Law Enforcement Section sa LTO 7 ngadto kang Regional Director Victor Emmanuel Caindec, ang drayber sa motorsiklo nga ni-overtake atol sa disgrasya nga nakaingon sa pagkabangga sa laing motorsiklo nagmaneho og expired nga student-driver’s permit.

“Base sa LTO-IT records sa involved parties, duha (2) ang walay valid registration ug usa (1) ang nagmaneho nga expired student permit atol sa aksidente,” basa sa tipik sa report sa LTO 7.

Giila sa LTO 7 si Nick Jasin Flores, 35, nga nagmaneho nga walay balido nga lisensya nga nisangpot pagpahamtang kaniya og accessory penalty nga disqualification gikan sa paghatag og driver’s license sulod sa usa ka tuig gikan sa pagmulta.

Niadtong Biyernes, Enero 14, na­matay sa aksidente sa dalan ang 22-anyos nga si Mary Grace Del So­corro human nalagpot sa gisak­yang motorsiklo ug naligsan sa trak.

Si Del Socorro, taga Barangay Pardo sa dakbayan sa Sugbo kauban sa iyang kapuyo nga nagmaneho sa motorsiklo nga giilang si John Mark Tobes, 24.

Nasayran usab sa ahensiya nga si Tobes nagmaneho gamit ang dili rehistradong motorsiklo ug nag-atubang sa kalapasan sa reckless driving. (REV gikan sa PR)