Positivity rate sa Covid sa Cebu City 56.62 na
by Mae Fhel K. Gom-os
Niabot na sa 56.62 porsyento ang inadlaw nga positivity rate sa Cebu City, labing taas sukad nagsugod ang coronarivus disease 2019 (Covid-19) pandemic niadtong Marso 2020.
Kini human nakatala ang Siyudad og 902 ka bag-ong mga kaso sa coronavirus disease (Covid-19) sa 1,593 ka indibidwal nga na-test niadtong Biyernes, Enero 21, 2022.
Sa datus sa Emergency Operations Center (EOC) ning dakbayan, nagpakita nga ang Siyudad aduna nay 5,940 ka aktibong mga kaso sa 77 ka barangays.
Ang mga barangay nga adunay labing daghang kaso gikan Enero 12 hangtod Enero 21 mao ang Guadalupe (589); Lahug (394); Apas (298); Tisa (285); Labangon (248); Camputhaw (246); Capitol Site (241); Talamban (234); Mabolo (226); ug Sambag 2 (190).
Apan alang sa kinatibuk-ang positivity rate, ang Siyudad anaa na sa 9.88 porsyento gikan sa 487,035 ka mga indibidwal nga nasulayan sukad 2020.
“Pinakataas na karon ang positivity rate at 56.62%, kinahanglan magtinabangay ta nga mahinay man lang ang pagsaka aron dili intawn ma paralyze ang operation sa atong nga vital nga mga institution o establishments sama sa hospital, bangko, supermarkets etc,” matod ni Konsehal Joel Garganera , deputy chief implementer sa EOC sa dakbayan.
Giingon usab ni Garganera nga ang siyudad nakatala og unom ka bag-ong namatay sa Covid, nga nagdala sa kinatibuk-ang ihap sa namatay sa 19 karong bulana.
Sa unom nga nangamatay nga natala kaniadtong Biyernes, upat niini mga tiguwang ug lima ang wala nabakunahan batok sa Covid-19.
Matod niya nga tulo sa mga tiguwang ang wala pa mabakunahan samtang ang usa wala pa matino.
FRONTLINERS
Gibutyag pa sa konsehal nga mokabat sa 316 ka mga medical front liners sa Metro Cebu ang nataptan sa Covid-19 sa miaging 14 ka adlaw.
Hinuon, si Garganera niingon nga ang mga medical front liners asymptomatic o adunay mild symptoms lang tungod kay silang tanan nabakunahan.
Siya miingon nga sila sa pagkakaron ubos sa isolation, busa ang sirkumstansya makaapekto sa mga operasyon sa importanteng mga institusyon, ilabi na sa mga ospital.
Niini, gosublisubli sa konsehal ang iyang panawagan nga sundon ang minimum health protocols.
“Ug unsay nahitabo sa tambalanan mao sad sa uban nga mga establishment. Kinahanglan gyud ta magmatngon unya tuman sa pag sul-ob ug insakto sa atong facemask, limpyo kanunay sa atong kamot, lihay aning mga pundok pundok ug labaw na magpa bakuna gyud,” matod ni Garganera.
Tungod niini, giawhag niya ang publiko nga motabang sa pagminus sa pagkaylap sa Covid-19 aron dili maapektuhan ang operasyon sa mga hinungdanon nga institusyon o establisemento.
Dugang pa ni Garganera nga ang pakigbatok sa Covid-19 dili mahimo sa gobyerno lamang, tungod kay ang pagsaka sa mga kaso usa ka responsibilidad.
“Dili ni madala sa gobyerno, sa EOC, sa PNP o sa barangay lang. This is a shared responsibilities, kitang tanan adunay managsama sa pagsaka o pag-ubos sa kaso sa Covid. Ug magkahiusa ta, magtinabangay ta, walay imposible, Kaya Nato Ni. Sunod sa AAA, Amping Apilan og Ampo,” ingon niya.
Una nang gipahibawo sa Department oh Health (DOH) nga gipamubo niini ang isolation period sa mga healthcare workers ngadto na lang sa lima ka adlaw imbes 10 ngadto sa 14 ka adlaw.
Si Dr. Mary Jean Loreche, DOH 7 chief pathologist, niingon nga pipila ka mga local government units (LGUs) ang wala mosunod sa updated guidelines alang sa isolation sa mga healthcare worker nga lima lang ka adlaw.
Apan giklaro ni Loreche nga ang ilang isolation mahimong ma-extend gikan sa lima ngadto sa pito ka adlaw kon sila adunay symptomatic ug adunay commorbidities.
Ang pangu nga pathologist miingon nga iyang ipahayag ang kabalaka sa panahon sa iyang mga miting sa mga LGU, labi na sa mga EOC, nga mahimong buhian ang mga healthcare worker ug mga front liners base sa gi-update nga mga guideline.