Pulis namatay sa sunog sa Negros Occidental

MASULUB-ON ang Pasko sa pamilya sa usa ka pulis human kini natanggong ug namatay sulod sa nasunog nga balay sa Barangay San Fernando, dakbayan sa Talisay, Negros Occidental mga alas 6 sa buntag sa Sabado, Disyembre 25.

Ang lawas ni Corporal Joebert Diasanta napalgan sulod sa lawak sa iyang ginikanan dihang napalong ang kalayo, matod ni Senior Inspector Jovelyn Zamar, acting Talisay City fire marshal, sa SunStar Bacolod.

Sa inisyal nga imbestigasyon nagpakita nga wala mabantayi nga kandila ang nakaingon sa sunog sanglit ang balay nga nahimutang sa Luciana Relocation Site sa Purok Jacinto wa pay kuryente tungod sa pagkuso-kuso sa Bagyong Odette.

Matod ni Zamar nga paspas ang pagkaylap sa kayo sanglit ang balay ginama sa mixed concrete ug light materials.

Nilanat og 15 minutos ang kombate sa mga bombero una pa nila hingpit nga napawong ang kayo, dugang niya.

Mokabat sa P100,000 ang danyos sa sunog.

Si Uldarico Diasanta Jr., igsuon sa biktima, niingon nga siya ra ug ang pulis sa balay dihang niulbo ang sunog kay ang ilang mga ginikanan ug igsuong babaye niadto sa simbahan mga alas 4 sa kaadlawon. (uban ang mga taho gikan ni TDE)