Durant gisugat og pilde
Gisugat og kapildihan si All-Star forward Kevin Durant sa iyang pagbalik kagahapon, Disyembre 31, 2021 (RP time) gikan sa pagkatanggong niya sa Covid-19 health and safety protocols sa National Basketball Association (NBA).
Ang nagpukan kang Durant ug sa puwersa niini nga mao ang hosts Brooklyn Nets mao si All-Star center Joel Embiid ug ang Philadelphia 76ers, 110-102.
Nagpakatap si Embiid og 34 puntos ug pito ka rebounds aron pangulohan ang 76ers, nidugang og 25 puntos si Tyrese Maxey samtang niamot og 17 puntos si Seth Curry.
Adunay higayon nga nagbinigyanay sila si Embiid ug Durant nga nagdugkat og kainit sa duwa.
Hinuon pagkahuman sa kombati, nagkauli ra ang buot sa duha ka All-Stars ug nagpakita kini og respeto sa usa’g usa.
“If there’s one player I think is probably talented or more talented than me, it’s definitely him,” pagdayeg ni Embiid ngadto kang Durant.
“So I have a lot of respect for him. I admire his game. So we’re just competitive. Wins matter, every single one of them, and it’s always good to beat the best in the conference.”
Sa kadaugan, ang 76ers ningsaka sa 19-16 nga rekord nga maoy ikaunom sa Eastern Conference. Sa ilang bahin, ang Nets nagpabiling nag-una sa East bitbit ang 23-10 nga rekord taliwala sa kapildihan.
Ang Nets gipangulohan nila ni Durant ug James Harden pinaagi sa ilang 33 puntos matag usa samtang niamot og 12 puntos si LaMarcus Aldridge. (AP)
