Rabacal: Tindog Sugbo
by Manny Rabacal
Pakabana
Maayong pagkalukapa sa Sugbo sa Bagyong Odette. Sa Cebu City lamang miabot ang danyos sa pananum og kapin kun kulang P80 milyones way labut sa mokabat og binilyon ka pesos nga perdisyon sa imprastraktura sa elektrisidad, tubig, telecommunications, pagkaon ug uban pa. Way gipili ang hangin nga milampurnas sa mga balay sa mga kabus ug adunahan apil na ang mga dagkung building. Makita gihapon ang nangatumbang kakahuyan ug mga poste sa elektrisidad nga nagpasad sa kadalanan. Sigun sa akong nakita mas grabe ang kadaut nga dala ni Bagyong Odette kay sa Bagyong Ruping nga mikuso-kuso sa Sugbo niadtong Nobiyembre 12, 1990. Tungod usab tingali kay mas diyutay pa man ang mga building ug mga poste sa koriyente ug telekumonikasyon kaniadto.
Daghang mga tawo ang mikumentaryo nga mas paspas ang pagpanghipus sa mga basura nga dala sa bagyo niadtong panahuna. Ambut og tungod ba kay daghang mga trabahador nga biktima usab ni Odette. Apan ang sakit bati-on kining mga tawo nga mipahimus sa higayon nga inay mosimpatiya ug mosabot sa gidangatan sa isig nila ka tawo mipahimus na hinuon sa pagpatuyang og umento sa ilang mga baligya ug serbisyo.
Daghan usab hinuong matinabangon nga kaigsuonan nga mihatag og tubig, mitanyag og libreng charging sa mga gadget ug nanglimpiyo aron mahipus ang nangatumbang mga kahoy nga mibabag sa kadalanan nga wala na magpaabut sa taga- gobiyerno. Atong makita ang taras kun batasan sa tawo panahon sa katalagman. Bisan pa niini, magpasalamat kita sa kahitaw-an nga giluwas kita Niya sa maong katalagman. Tindog Sugbo!
Dili nato mabasul ang mga tawo nga magpaabut sa mga kandidato nga mobisita sa mga dapit nga gikuso-kuso ni Bagyong Odette, apil ang Sugbo. Dili man gyud tingali ang hinabang maoy ilang gipaabut, apan buot lang nilang masayran kon tinuod ba silang moserbisyo sa katawhan labi na ang buot magpapili pagka-presidente. Nahibawo na man tingali mo kon si kinsa kanila ang mibisita na dinhi sa Sugbo o ba kaha nagpada na og mga hinabang alang sa mga biktima sa bagyo. Anhi nato dinhi makita kon diin usab gikan kining ilang ihinabang.
Nakadayeg ko kang Presidente Rodrigo Duterte kay bisan sa iyang pangidaron ug kahimtang sa panglawas gisuroy gayud niya ang mga dapit nga nagrabihan sa Bagyong Odette, lakip na ang Sugbo. Gimandu-an usab niya ang mga ahensiya sa gobiyerno sa pag-atiman sa mga panginahanglan sa mga biktima apil ang pagahin og binilyon ka pesos alang sa ihinabang kanila. Kalimtan usa nato ang pamulitika. Hinunoa maghiusa kita alang sa atong mga kaigsuonan nga nagkinahanglan og tabang. (mannyrabacal1144@gmail.com)