Hirit: Sa kalisdanan, biseklita ang gikinahanglan
Jason Borgonia
Basak, Lapu-Lapu City
Grabeha ka taas sa linya sa mga tawo nga gustong mo-withdraw sa ilang kwarta gikan sa ATM machines. Tanang ATM nga online ug mga banko nga nagpa-over the counter. Kon unsa ka taas ang linya sa mga gasoline station, mao usab ang sa mga banko. Bisan gani fastfood gilinyahan gihapon.
Samtang naghuwat ko sa akong asawa, dunay babaye nga nag mountain bike nga niduol nako, nangutana kon asa kaha ang mga ATM machine nga di kaayo taas ang linya. Nag bike siya gikan sa Mandaue padung sa IT Park aron mo-withdraw unta, but daghan man ang naglinya nakahukom siyang mobalhin.
Wa siya magdala og sakyanan kay mas hasol kuno mangita og parking area while ang biseklita iyang maguroy or mabutang sa dapit nga iya lang malantaw.
Sakto kaayo siya sa iyang gibuhat ug desisyon. Mas sayon ang mobility sa biseklita karon kay sa magdala ka og sakyanan sa pag-withdraw. Kon moadto ka og IT Park, mangita ka pag dapit diin ka maka-park sa imong sakyanan. Unya kon daghan ang nang withdraw, mobalik ka na lang sa parking area. Kapoy, di ba?
Samtang sa biseklita, mahimo ra kaayo nga imong guruyon nga di ka mabalaka nga nakabalda sa trapiko ug pwede kaayo ka sa mga ATM nga naa sa national highway nahimutang. Makapa ilin ilin ka. Kapoy man tuod ang sikad, apan you are burning calories, nga maanindot kaayo labina ning kapaskohan nga daghan ang kaon ug inom bisan giigo pa ni Odette.
Mas maayo usab ni nga alternatibo nga transportasyon sa mga dapit nga lisod pang kaagian ug naghuot pa ang trapiko. Mas maayo usab ni itandi sa mga motorsiklo samtang nagnihit pa ang mga gasoline station nga nag-operate. Di baya lalim ang paglinya ubos sa naglagiting nga adlaw o kaha sa mabugnaw nga kagabhion nga angay na unta nga ikaw natulog na.
Apan sa tinguha nga magpuyo nga sayon, naglisod na hinuon. Mas sayon ang mobility tungod kay wa kay huna hunaon nga parking kon ang imong tuyo mao ang pag-withdraw og kwarta, mopalit og pipila ka items sa convenience stores o kaha magsuroy-suroy aron mangita og dapit nga mapalitan og pagkaon ug tubig. Kanang mag-survey lang ka, gamit kaayo ang biseklita, labina diri sa amoa karon sa Lapu-Lapu City nga di matagakan og dagom ang dalan.