5 sakop sa sindikato patay; 4 pulis samdan
By Edgar E. Fuerzas
Gibutyag ni Police Regional Office-Soccsksargen Director Brigadier General Alexander Tagum nga isilbi na unta sa kapulisan ang search warrant, uban sa militar, batok sa grupo nga nalambigit sa carnapping, robbery hold-up ug financier sa Bangsamoro Islamic Freedom Fighters (BIFF) didto sa Barangay Gokotan sa nahisgutang lungsod.
Nisukol ang mga suspek nga miresulta sa pinusilay hinungdan sa pagkamatay sa lima ka mga armado, lakip na ang usa ka babaye nga gingong sakop sa carnapping syndicate.
Apan lima sab ka mga pulis ug usa ka sibilyan ang nasamdan atol sa panag-engkuwentro.
Naa na sa balay tambalanan si Police Lieutenant Xiart Gatinao ug mga kauban niini nga mga patrolman nga sila Aden Cocal, Christian Carl Ansing ug si Corporal James Jay Belonio tungod sa mga samad sa bala nga naangkon.
Gikompirma ni Tagum nga moabot sa 450 ka mga suspected carnap motorcycles ang narekober gikan sa gialegar nga most wanted carnapping syndicate ug BIFF financier.
Apil sa mga nakuha sa posisyon sa mga napatay ang duha ka M60 machine gun, usa ka B-40 anti-tank rocket, 3 M16 Armalite rifles, 1 M14 rifle, 1 M203 rifle, usa ka .30 caliber Carbine, duha ka .38 caliber revolvers, mga bala, magazines, improvised explosive devices ug kagamitan sa paggama og bomba.
Atol sa hitabo, patay sab ang usa ka opisyal sa Moro Islamic Liberation Front human malumos sa sapa samtang nag-reposistion ang ilang grupo sa operasyon sa kapulisan ug militar.
Apan mga napatay nga suspek gihimakak sa ilang pamilya nga mga karnaper sila og mga motorsiklo kay duna silay mga papeles.
Gikasuko sab sa mga molupyo sa Barangay Gokotan gumikan kay nalakip pagkamatay ang usa ka babaye sa operasyon sa mga sundalo ug pulis.
Sa pagsuwat ning balita, naa sa heightened alert ang puwersa sa militar ug kapulisan sa Pikit sa posibleng panimalos sa mga kauban sa mga napatay.
