Editoryal: Hinabang mibaha - SunStar

Editoryal: Hinabang mibaha

KAPIN na sa semana human nikusokuso ang bagyong Odette niadtong Disyembre 16, Huwebes, sa gabii, apan wala pa hingpit mahibalik ang normal nga kinabuhi sa katawhan.

Dili tiaw ang kalapad sa kadaut ni Odette sa Sugbo. Masabtan nga wa dayon matapos ang rehabilitasyon labina sa elektrisidad ug supply sa tubig nga nag-unang panginahanglan.

Mapasalamaton kita nga nagbaha ang hinabang ug suporta sa pagpanglimpiyo sa nangagubang sa linya sa kuryente ug tinubdan sa tubig. Lakip sa paghatag og ayuda sa katawhan gikan sa kagamhanan ug mga pribadong sektor o kompaniya.

Si Presidente Rodrigo Duterte nigahin og dili miminos P10 bilyunes alang sa rehabilitasyon sa mga dapit nga grabeng naapektohan ni Odette. Ang mga lokal nga kagamhanan ninghimo usab sa ilang inisyatiba sa pagtabang sa ilang konstituwente sa materyal, pinansiyal ug mga pagkaon.

Ang Pitmasters Foundation, niabot dinhi sa Sugbo niadtong Sabado, Disyembre 18, 2021, alang sa ilang gipahigayon assesment ug nanghatag og hinabang sa dili mominos 100,000 ka mga tawo sa Sugbo. Daghan pang uban nga mipadala sa ilang tabang sa Sugbo labina sa utility companies.

Tungod sa kalapad sa kadaut, dili kini madali sa pagpahiuli. Gikinahangkan ang atong pag-antos ug pasensiya. Apan dili lalim ang nahiagom busa dili usab kita makabasol sa ubang katawhan nga magyawyaw bahin sa kahinay sa rehabilitasyon labina sa pagbalik sa linya sa kuryente.

Taliwala sa katalagman, mapasalamaton gihapon kita sa pagbaha sa hinabang nga nakapalibyo sa atong kahimtang . Walay usa kanato nga gusto nga mahitabo kini. Inay nagbagulbol, nagtinabangay kitang tanan aron mas madali ang pagbalik sa normal nga sitwasyon sama sa yanong pagpanglimpiyo sa nagusbat nga palibot.

Bisan nagbaha ang hinabang, dili kini malahutayon. Ang atong paningkamot maoy labing maayo sa tanan.

Leave a Reply

Your email address will not be published.