245 ka barko gibanlas ni Odette, nasangad sa lainlaing dapit sa Central Visayas
Gipahibawo sa Phiippine Coast Guard Cebu nga sa labing uwahi nila nga talaan, sila nakalista og 245 ka mga cargo/ passenger vessel nga nasangad, pito ang nalunod ug 13 ang mitikyaob sa nagkadaiyang mga dapit sa Central Visayas.
Matod ni Captain Alvin Dagalea, Commander sa Coast Guard Cebu, nga nagpadayon pa ang ilang pag suta karon kon duna pa bay dugang mga barko nga nangasangad atol sa paghapak sa bagyong Odette niadtong Disyembre 16.
Iyang giangkon nga hinay ang pagpangabot sa mga impormasyon tungod sa kalisod sa komunikasyon.
Duna silay sub stations nga way signal busa wa makataho.
Duha pa ka mga barko ang missing, apil na ang 16 ka mga tripolante.
Mokabat sa 11 ka mga crew sa MV Strong Trinity ug lima sa MV Ida ang missing. Ang duha mga tugboat.
Ang Trinity nag angkorahe sa dakbayan sa Talisay samtang ang Ida nag angkorahe sa Tayud, Consolacion, amihanang Sugbo sa pag-igo sa bagyo.
Matod ni Dagalea nga magpadayon ang pagpasawom sa ilang divers sa mga dapit diin posibleng nangalunod ang duha ka mga tugboat.
Samtang grabe ang kadaut nga gimugna sa bagyo ngadto sa panginabuhi sa mga mananagat.
Sa lungsod lang sa Cordova, 113 ka mga bangka ang giguba samtang 14 usab ang gibungkag sa bagyo sa dakbayan sa Lapu-Lapu. (BBT)
