Rockets gipusgay sa Bucks
Nagpakatap og 24 puntos si Jrue Holiday samtang niamot og 23 puntos si Khris Middleton aron agakon ang hosts Milwaukee Bucks ngadto sa dakong kadaugan batok sa Houston Rockets, 126-106, kagahapon, Disyembre 23, 2021 (RP time) sa National Basketball Association (NBA) 2021-22 season.
Maayo sab nga nakaduwa alang sa Bucks mao sila si DeMarcus Cousins ug Jordan Nwora, kinsa parehong nipupo og 18 puntos, apan si Wesley Matthews maoy nikawat og dakong atensyon sa ilang puwersa.
Si Matthews, kinsa nagbangutan pa sa kamatayon sa iyang lola ug gikan sab kini sa quarantine sa Covid-19 heatlh and safety protocols sa liga, niamot og kaugalingon niyang season-high nga 17 puntos.
“It meant the world to me because my grandma meant the world to me,” matod ni Matthews.
“What brought her the most joy was watching me play. There was no doubt. I knew what I had to do.”
Si Bucks coach Mike Budenholzer nakadayeg og maayo sa gipakitang determinasyon ni Matthews.
“He’s one of the ultimate warriors I’ve ever been around,” asoy ni Budenholzer. “I have so much respect for him. So glad he’s here. That’s one of the more impressive things I’ve seen in a long time, for a lot of reasons.”
Sa nag-una niyang upat ka mga duwa gikan sa iyang pagpirma og kontrata sa Bucks niadtong Disyembre 3, 2021, tulo ka mga puntos ra ang labing dako nga nahimo ni Matthews.
Apan ning higayuna, gipakita ni Matthews nga makatampo sab siya og dako sa kampanya sa defending champions. Mitali siya og 4-of-5 three-point shooting.
“I didn’t know what to expect, what kind of emotion,” dugang ni Matthews.
Sa ikaupat nga sunodsunod nga higayon, ang Bucks ningkombati nga wala ang ilang lider nga si 2-time MVP Giannis Antetokounmpo, kinsa anaa pa sa listahan sa health and safety protocols kauban sila si Bobby Portis ug Donte DiVincenzo.
Ang Bucks naggunit og 20-13 nga rekord, ikatulo sa Eastern Conference, samtang ang Rockets ningsukarap sa 10-22 nga rekord, labing ulahi sa Western Conference.
Sa laing mga sangka, ningdaog ang Orlando Magic batok Atlanta Hawks, 104-98, Boston Celtics batok Cleveland Cavaliers, 111-101, Oklahoma City Thunder batok Denver Nuggets, 108-094, ug LA Clippers batok Sacramento Kings, 105-89. (AP)
