Gas stations gidid-an pagsulod sa extra containers, pagpaumento sa presyo sa lana

Si Cebu City Mayor Michael Rama mimando nga matag sakyanan ug unsay kapasidad sa masulod niini nga lana mao lang ang sudlan, wa nay lain pa.

Si Rama nagdili sa tanang gasoline stations sa pag-refill sa mga container, barel ug uban pa nga mga sudlanan.

Mao kini ang gilatid sa Directive No. 12-22-2021-01 nga giluwatan ni Rama sa Disyembre 23, 2021.

Hinuon, way labot ang Visayan Electric ug ilang pribadong contractors, National Grid Corporation (NGCP), Davao Light and Power Corp. ug ilang contractors ingon man ang Meralco ug ilang contractors.

Wa usay labot ang telecommunication companies, Metro Cebu Water District, emergency response vehicles sa kagamhnan ug pribado, hotels ug ubang essential services.

Gidili usab ni Rama ang way pagtugot nga umento sa presyo sa lana nga molabaw sa existing rates matag litro.

“Gas stations and other authorized dealers of gasoline and diesel fuel are prohibited from imposing and increasing fuel prices over the allowed or price rates in their respective areas. Neither shall they be allowed to manipulate prices by means of creating an artificial shortage,” matod sa kamandoan, nga tipik sa Oplan Puyo order.

Gitugtan hinuon ang mga balay patigayon ug uban pa nga makapasulod og containers basta duna silay makapakitang kamatuoran sama sa business permit ug uban pa.

Moluwat usab si Rama og kamandoan sa Disyembre 24 nga magtugot sa mga panimalay nga makapalit og gasolina sigon sa panginahanglan niini, sama sa mga power generator nga ilang gigamit.

Iyang giluwatan ang kamandoan aron masibo sa kamandoan ni Gob. Gwen Garcia.

Si Rama una nang nimando sa pagdili sa mga sakyanan nga maglinya daplin sa kadalanan sa dakbayan aron matubilan sa mga gas station.

Tugtan lang ang mga sakyanan nga maka-park gikan sa alas 8 sa gabii hangtod sa alas 6 sa buntag sa pagkasunod adlaw.

Si Rama nipasabot nga sa mao nga mga oras di na puno ang kadalanan sa mga sakyanan busa di na maghuot ang dagan sa trapiko.

Ang mayor nipasabot nga tungod sa namugna nga kahuot sa trapiko sa naglinyang mga sakyanan, nabalda ang pagtubag sa mga emerhensya ug relief operations.

Iyang gimandoan ang kapulisan, Cebu City Transportation Office (CCTO) ug ubang mga ahensya sa pagpatuman sa iyang kamandoan dinhi sa dakbayan sa Sugbo.

KAPITOLYO

Aron malikayan nga dunay hoarding, nimando si Garcia sa mga gas station nga ang sudlan og fuel mao ra ang tangke sa matag sakyanan kutob sa iyang kapasidad, wa nay laing sudlanan sama sa barel, containers ug uban pa.

Tanang personnel sa gas stations gipangdid-an sa pagsulod og gasolina ug krudo sa mga barel, container ug uban pang mga sudlanan nga dad-on ngadto sa station.

Mao kini ang nalatid sa Executive Order No. 50 nga giluwatan ni Cebu Governor Gwendolyn Garcia sa Martes, Disyembre 21 nga miepekto sugod sa tungang sa Miyerkules, Disyembre 22, 2021.

Hinuon, dunay gitugtan nga makakarga og daghang fuel sama sa mga tambalanan, hotel, banko ug uban pang mga essential ug mga establisemento nga pangserbisyo publiko.

Apan gikinahanglan nga mopakita sila og kamatuoran sa ilang negusyong nahisgutan, sama sa business permit ug uban pang paagi.

Gitugtan hinuon ang mga tag-iya og balay nga makapalit og fuel, apan gilimitahan lang sa 10 litros basta makapamatuod sila sa pagpanag-iya niini sama sa hulagway ug resibo sa pagpalit.

Gipangdid-an usab ang mga gas station sa pagpaumento sa ilang presyo. Gikinahanglan nga ibase kini kon unsay naandan nga presyo karon sa merkado.

Si Garcia nipasabot nga iya kining giluwatan human ang tag-as nga mga linya sa sakyanan nakamugna og kahuot sa trapiko sa kadalanan.

“There have also been reports of price increases of gasoline and diesel fuel across the Province of Cebu,” nagkanayon ang EO sa gobernador human moigo ang bagyong Odette nga nakamugna og grabeng kadaut sa Sugbo nga niresulta sa blackout sa tibuok isla sugod sa Huwebes sa gabii, Disyembre 16.

Human sa bagyong Odette, dunay mga gas station nga wa dayon makabalik sa pag-operate tungod kay way generator set. Gimub-an usab sagad sa gas stations ang ilang operating hours gikan sa buntag hangtod sa alas 6 sa gabii.

Hinuon uban kanila nga hangtod sa alas 10 sa gabii abli pa.

Duna say nangaguba nga gas stations tungod sa bagyo.

Apan gitataw sa Department of Energy (DOE) nga dunay igong supply sa lana ang Sugbo sa mosunod nga 16 ka mga adlaw ug magpadala pa og dugang supply dinhi sa Sugbo. (REV)