2 ka magsuon, 2 ka mga pulis patay sa pinusilay sa Cotabato

Central Mindanao – Upat ang nangamatay sa pinusilay tali sa mga pulis ug duha ka magsuong mga negusyante mga alas 5:30 sa Miyerkules sa buntag, Disyembre 22, sa probinsya sa Cotabato.

Sa report sa North Cotabato PNP, nagpahigayon og surveillance operation sila si Police Chief Master Sergeant Fletcherlyn Dominic Pido ug Police Staff Sergeant Arman Bada sa gipuy-an ni Jerson Papna nga dunay warrant of arrest sa kaso nga pagpatay.

Apan nakamatikod ang managsoong Papna, namusil sila sa mga pulis hinungdan nga nahitabo ang pinusilay.

Atol sa pinusilay, nangamatay nga sila Jerson, 35, ug ang igsuon niini nga si John Kevin Papna, 26. Ang magsuon mga negusyante ug mga residente sa Purok 1, Barangay Bialong, M’lang, Cotabato.

Sa labing uwahing report, nangamatay sab sila si Pido ug Bada.

Matod sa kapulisan nga unang napatay si Jerson, apan nakabalos pagpusil si John Kevin sa duha ka mga pulis una pa usab napatay.

Sa pagsuwat ning balita, nagpadayon pa ang kapulisan sa ilang makuti nga imbestigasyon aron maestablisar ang matuod nga hinungdan sa pinusilay. (SunStar Philippines)