Nets dou nagbangis
Gisakmit og balik sa Brooklyn Nets ang number one seed sa Eastern conference human ilang gipukot ang San Antonio Spurs, 117-102 sa AT&T Center sa Texas.
Si James Harden nikulit og triple double pinaagi sa iyang 37 puntos, 11 rebounds ug 10 assists aron pangulohan ang Nets samtang nagpaalim sa iyang angol ang iyang kaubang star nga si Kevin Durant.
Ang wa pa nagbakuna nga laing star nga si Kyrie Irving nipaarak og 15 sa iyang 24 puntos sa fourt quarter aron isiguro ang ilang kadaugan ug hulipan ang Chicago Bulls kinsa nahagsa sa number 2 seed.
“James was electric at times and brilliant obviously. The stat line is incredible. And Kyrie is an assassin at times too, just being able to create offense for himself,” matod pa ni coach Steve Nash.
Human sa 12 ka deadlock ug 16 ka higayon sa pagpuli-puli og labaw sa unang tulo ka quarter, nisutoy lang og kalit ang Nets pinaagi sa pagtimon sa duo sa Nets nga si Irving ug Harden.
Sa laing mga duwa, gitangkugo sa Los Angeles Lakers ang Orlando Magic, 116-105 sa ilang kadaugan aron mabalik sa .500 sa percentage pinaagi sa ilang 23-23 win-lose record nga nahagbong na sa top 6 sa Western Conference.
Si Lebron James maoy nangulo sa Lakers pinaagi sa iyang 29 puntos ug niamot og 23 si Carmelo Anthony, ug 18 puntos ug 11 rebounds ang giabag ni Russell Westbrook.
Samtang napasulod ni Stephen Curry ang iyang fadeaway jumpshot sa himatayong segundo aron ituboy ang Golden State Warriors sa kadaugan batok sa Houston Rockets 105-103 nga giduwa mismo sa ilang balwarte.
Gipaak sa Memphis Grizzlies ang Denver Nuggets, 122-118, gipakong sa Utah Jazz ang Detroit Pistons 111-101, gibawsan og sungag sa Milwaukee Bucks ang Chicago Bulls 94-90.
Gikumot sa Toronto Raptors ang Washington Wizards, giligsan sa Portland Trail Blazers ang Boston Celtics, gitangag sa Atlanta Hawks ang Miamit Heat, 110-108, gipatapsingan sa Los Angeles Clippers ang Philadelphia 76ers 102-101 ug gituhik sa Charlotte Hornets ang Oklahoma City Thunder, 121-98 atol sa mga duwa sa NBA kagahapon. (AP)