112K cubic meters sa tubig kada adlaw ang na-supply sa MCWD
Pito ka adlaw human mohapak ang bagyong Odette, ang Metro Cebu Water District naka-supply na og 112,800 cubic meters sa tubig sulod sa iyang franchise area.
Matod sa water firm nga mao na kini ang ilang gi-supply matag adlaw kun 46 porsyento sa ilang water production.
Gisaad sa water district nga samtang nagpadayon ang paninguha sa Visayan Electric (Veco) nga mahatagan na og kuryente ang ilang tanang pump stations, butangan una kini og generator sets.
Samtang nasiril siril pagpangita og tubig ang kadaghanan sa mga Sugboanon karon, duna say mga mapahimudsanon sa higayon, ilang gipangguba ang mga tubo sa Metro Cebu Water District (MCWD) aron makakuha og tubig sa pugsanay nga paagi.
Labing minos 13 ka stub-outs ang giguba sa mga tawo sa nagkadaiyang dapit sa Metro Cebu ug gigamit nga tinubdan sa tubig sa mga tawo nga nagpuyo duol niini.
Dunay uban nga naabtan pa sa mga personnel sa MCWD nga nangaligo, labina ang mga bata.
Ang stub-out mao ang tumoy sa tubo alang sa distribution paingon sa water meter connections.
Nabalaka ang water district kay kuyaw na hinuon nga makontaminado ang tubig kay abli na man ang tubo ug masulod ang bisan unsa nga butang.
Ang tanang tubig sa MCWD limpyo ug luwas nga imnon kay kanunay kini nilang gipailawom sa strategic sampling alang sa pagsusi sa kalidad.
Apan kon naputol ang tubo, di na maseguro ang kaluwas sa tubig sa dapit nga i-supply kini.
Karon nga daghan ang gitrabaho sa MCWD human sa bagyong Odette, mas lisod nga mahibalik dayon ang supply sa tubig. Di na maabot ang supply ngadto sa mga balay nga nakakonektar sa stub-out nga naputol.
MGA TRAK
Nagsugod na sa pagpakatap og mga trak ang MCWD sa mga dapit nga wa pay supply sa tubig.
Sa Huwebes, Disyembre 23, ang MCWD nagpakatap og unom ka mga trak. Ila kining dugangan og 17 ka units sugod sa Biyernes, besperas sa Pasko.
Gipaneguro sa MCWD nga ang ilang mga trak kanunay gi-disinfect busa limpyo ug mainom ang tubig ug nakapasar kini sa Philippine National Standards for Drinking Water.
“MCWD’s laboratory conducts regular water quality monitoring of water from strategic sampling points in MCWD’s distribution network to ensure a safe and potable drinking water supply for consumers. MCWD’s sampling points are far more than what is required by the government,” matod sa water district. (REV)
