Danao City, Consolacion mipadayon sa Covid-19 vax
Dose ka adlaw human sa pag-igo sa bagyong Odette, ang Dakbayan sa Danao mopadayon na sa ilang pagpamakuna batok sa coronavirus disease 2019 (Covid-19) sa Disyembre 28 ug 29.
Hinuon, mas sayo ang ilang gitakdang cut-off ug kini sa first ug second dose.
Sa Civic Center, ang cut-off time sa alas 2:30 sa hapon. Alang sa mga hamtong, sa first ug second dose, ang ilang pagpamakuna sa duha ka mga adlaw.
Alang sa pedia, ang second dose lang ang bakunahan.
Sa City Mall, alang lang kini sa second dose sa pedia samtang ala 1 sa hapon ang cut off time.
Niadtong magpabakuna unta sa Disyembre 15-23 nga scheduled alang sa first dose, mahimong makapabakuna sa nahisgutang duha ka mga adlaw, apan kinahanglang makaabot sa cut off sa oras.
Di usab angay maguol ang wa mabakunahi sa second dose nga naka schedule unta alang sa second dose sa nakalabay nga mga adlaw kay ang gitakdang pagpamakuna sa Enero 3-7, 2022 alang ra sa second dose, way labot ang first dose.
Sa magpabakuna sa first dose, dad-a ang Covid-19 vaccination card ug balidong identification (ID) card.
Way pagpamakuna sa Disyembre 30 ug 31.
Sa Enero, ang venue sa second dose alang sa mga hamtong mao gihapon ang Civic Center samtang alang sa second dose sa pedia pagahimuon sa CSA-Sands Campus (Padua).
BALIK NA SAB
Di lang kay ang Danao City ra ang mipadayon na sa pagpamakuna.
Ang local government unit (LGU) sa Consolacion mipadayon na sab sa pagpamakuna batok Covid-19 sa Lunes, Disyembre 27.
Naa lang kini gipahigayon sa Municipal Covered Court samtang ang SM Consolacion wa pa mobalik sa pagpamakuna. (REV)
