Talisay mang apod-apod og bugas sa matag pamilya
MANG-APOD-APOD og tag P25 ka kilo nga bugas humay matag pamilya ang kagamhanan sa Dakbayan sa Talisay sugod sa Martes o Miyerkules, Disyembre 22, 2021, pahibawo ni Mayor Gerald Anthony “Samsam” Gullas sa Lunes, Disyembre 20, 2021.
Matod sa mayor nga di magpili ang local government unit (LGU), bisan kadtong nagpuyo sa mga subdivision lakipan sa paghatag og usa ka sako nga tag 25 kilo nga bugas.
Iyang giawhag ang katawhan, labina na niadtong nagpuyo sa dagkong mga barangay, sama sa Dumlog, Tabunok ug San Roque, nga magpasensya kay di madali paglukop og hatag kay molanat kini og tulo ngadto sa upat ka adlaw tungod sa kadak-on sa mga dapit.
Apan gipaneguro ni Gullas nga ang tanang mga pamilya mahagatagan gyud.
Kon ang usa ka balay gipuy-an og duha ka mga pamilya, duha sa tag 25 kilo nga sako sa bugas ang ihatag.
“Hangyo lang ko, please be patient. Dili gyud na madala hatag in one day tanan especially if dako kaayo ang barangay. Maybe it will take a couple of days to finish distribution to all,” matod sa mayor.
Iya usab nga gitataw nga di tanang sako mosulod og 25 kilo kay dunay tag lima lang ka kilo ang masulod depende sa ilang napalit. Apan mahimo gihapong 25 kilo tungod kay lima ang ilang ipanghatag.
Nanghawan
Nagpadayon usab sa pagpanghawan ang LGU sa mga karsada aron maagian na og mga sakyanan, labina sa interior nga mga karsada.
Ila nang nahawanan sa mga debris ang gikan sa Camella Homes padung sa Barangay Maghaway.
Gikinahanglan nilang panghawanan ang mga karsada aron mahatod ang mga hinabang sama sa pagkaon ug tubig.
Nagpadayon ang Talisay LGU sa pagpang-apod-apod og tubig sa kabarangayan samtang nagpadayon ang mga barangay sa pagpanghawan.
“Naa lang gyuy uban nga maglisud ta but ato gyung pangitaan og pamaagi makalusot ta, especially now na nanay gamit ang mga barangays such as chainsaws,” dugang sa mayor. (REV)
Maayo ning bata-bata pa ang mayor sa dakbayan kay hanas pa molihok kung naay emergency. Kani hinuong nadugay na nga halos malata na og nilingkod sa ilang pwesto, mao pa ang hinay kaayo og lihok. Tinapol ba kaha ning ilaha o pulpol lang gyud ning mga tawhana? Kahibaw ba kaha ni sila maghuna-huna o wala gyud ni mga hunahuna?
Maayo pa ning si Mayor Samsam kay maggahin gyud og oras para sa iyahang dakbayan. Di lang pud unta sagulan og inamaw sa mga naa sa ubos. Ang uban ra ba, himuon na hinuong pamolitika ang pagtabang sa taw. Hinuon pud, ma-maayo o ma-bati, naa man gyud mastorya ang taw.
Daghang salamat sa mga kahibaw manalipud sa katungod sa matag lungsuranon. Bangon ta, Cebu kay natog pa ang ubang giluklok ta sa kagamhanan.