P1.7B danyos sa Cebu City
by Philip A. Cerojano
Gibanabana nga mobot og P1.7 bilyunes ang gibilin nga kinatibuk-ang danyos sa bagyong Odette sa kabalayan sa dakbayan sa Sugbo.
Wala pay labot sa kwentada niini ang kadaut sa mga imprastraktura sa kagamhanan, ubang pribadong kompaniya ug negosyo.
Kini ang gipahibalo ni Mayor Michael Rama human sa gipahigayon nga inspeksyon sa Cebu City Disaster Risk Reduction and Management Office (CCDRRMO) nga maoy nibanabana sa kadaot ni Odette.
Gumikan niini, si Presidente Rodrigo Duterte kauban si Senator Bong Go, mobisita karong adlawa, Disyembre 23, sa dakbayan aron personal nga susihon ang danyos nga gibilin ni Odette.
Sila si Duterte ug Go dinhi sa Sugbo niadtong Dominggo, Disyembre 19, apan nag-aerial survey sa habagatan sa Sugbo ug nibisita sa lungsod sa Argao nga sentro sa pag-landfall sa bagyong Odette sa Sugbo niadtong Disyembre 16, Huwebes.
Samang adlaw, ang delegasyon ni Duterte nilahos sa lalawigan sa Bohol.
Samtang, ang Cebu City Government pinaagi sa City Council nipasar og P1 bilyon para sa recovery program human sa trahedya.
Si Rama nagkanayon nga dili paigo ang P1 bilyon hinungdan nga siya nagpahinumdom sa national government kabahin sa natampo sa Cebu city para sa ilang panudlanan diin binilyon nga buhis ang nahatod sa Cebu City para sa national treasury.
“The contribution of Cebu to the economy is so much, therefore though we have a share of IRA but who will not accept if they will come,” pasumbingay ni Rama.
“Ang amo mahatag is P1B, asa mi mokuha sa remaining? Kon nakasabot sila ana, definitely we want also our share of the assistance because we have always been very good in terms of giving our share of the whole economy,” dugang ni Rama.
Gipaabot nga personal nga magkaistorya si Rama ug Duterte inig tugpa sa abyon nga sakyan sa pangulo ug dinhi masayran kon unsay mapaabot nga ayuda nga madawat sa Dakbayan gikan sa nasudnong gobiyerno.
Ang estimated damage gikan sa CCDRRMO wala pay labot sa business sector kansang mga commercial establishment giguba usab ni Odette, utilities sama sa Visayan Electric Company (Veco) ug telecommunication companies.
Ang City Agriculture Department pinaagi sa ilang pangulo nga si Joey Baclayon nagkanayon nga niabot sa P78.9 milyones ang danyos sa produktong agrikultura.
Sa pikas nga bahin, ang Cebu City nisugod na sa ilang clearing storm gamit ang mga heavy equipment aron mapaspasan og limpyo gikan sa mga natumbang kahoy, basura nga nagtapok ang mga kadalanan aron mahibalik sa normal ang dagan sa trapiko.
