Gidunggab tungod sa lalis kon kanus-a mosiga ang suga, patay
Dead-on-arrival (DOA) sa tambalanan ang usa ka libud-suroy human dunggaba sa kainom nga usa usab ka libud-suroy sa daplin sa dalan Pelaez, Barangay Kamagayan, siyudad sa Sugbo niadtong Martes sa alas 10:00 sa gabii, Disyembre 21.
Ang namatay nga biktima nailhan lang sa ngalan nga ‘Ryan’, naa sa 30 ang panuigon, samtang ang suspek nailhan ra usab sa ngalan nga ‘Cyrie’, hingkod na.
Ang hepe sa Parian Police Station-1, Police Major Albert Quilitorio,, nibutyag nga ang duha sa wala pa nahitabo ang pagpangnunggab, nag-inom ug nagkalalisay.
Matod ni Quilitorio nga subay sa nahinabi sa iyang imbestigador nga sila si Ryan ug Cyrie nagkalalis kabahin sa kon kanus-a mosiga ang sugang dagitab.
Apan si Ryan nagsige og balikbalik sa pangutana kon nganong magproblema man si Cyrie nga wala man silay suga kay naa raman sa daplin sila tingkatulogan.
Gituohan gisamokan ang suspek nga ginawongnawong uo balik sa pangutana mahitungod na sa suga apan, nikuot kini og kutsilyo dayon dunggab sa biktima.
Si Ryan nakaangkon og samad sa iyang dughan nga miresulta sa iyang kamatayon.
Samtang si Cyrie dali nga nisibat usab human sa hitabo ug wala na igkita sa kapulisan hangtod ning pagkutlo sa taho.
Sa pagkakaron, ang dakong bahin sa Metro Cebu walay suga tungod sa pagkaputol sa linya sa kuryente mugna sa pagkusokuso sa bagyong Odette. (BBT)
