Editoryal: Hain ang mga lider?

Grabe ang kalisod nga nasinati karon sa Sugbo. Daghan ang mga dapit nga tingali hangtod karon wa pa maabti og mga hinabang tungod kay di pa maagian. Wa pa say mga komunikasyon ang kadag­hanan sa mga dapit. Bisan gani sa Metro Cebu, magpawongpawong ang signal sa mga telecommunication.

Grabe ang linya sa mga gasolinahan, mga banko, tubigan ug bisan gani mga kan-anan.

Dunay pipila ka mga post sa social media nga nagdasig sa katawhan nga manglimbasog kay makabangon ra kitang tanan.

Apan bisan pila ka milyon ka social media posts ang ibutang, di ni makadulot sa publiko tungod kay pila ra man say makabasa kay wa may access sa internet ang kadaghanan sa katawhan.

Gawas pa, wa kay makitang lider nga mingsuroy sa kadalanan aron pagdasig sa katawhan nga manglimbasog sa pagbangon. Bisan mga barangay kapitan gipangita na sa mga tagi barangay kay bisan anino wa silay nakita. Mag-unsa man ang mga pulong kon ang katawhan way makita nga lider nga nagsud-ong sa panglimbasog sa paglinya sa pagkuha og kwarta, pagpagasolina nga molanat ang paghuwat og taglima ka oras ug pagpangitag tinubdan sa tubig.

Ang yanong mga lungsoranon karong pana­huna nangita og mga lider taliwa sa krisis. Apan wa silay nakita, gawas lang sa ilang mabasa sa mantalaan ug social media. Busa, di makahupay ug makadasig ang mga pulong nga haw-ang. Ginaingon baya nga ang buhat mas madungog pa kay sa mga pulong. Lahi kon ang buhat maoy paestoryahon.

Wa pa guy nakabadlong sa mapahimudsanong mga negusyante nga grabeng nakapasaka sa presyo sa lana matag litro. Duna say uban nga nanago og gasoline unya gibaligya sa mahal kaayo nga presyo.

Ang mga konsumidor wa na lang usab mo­rek­lamo tungod kay gikinahanglan kaayo ang fuel karong panahuna. Karon nag-iyahay ang katawhan pagpaninguha sa pagpabangon sa kinaugalingon.