Mga lumad gidalitag pamasko sa LGU-Tagum
By Jeepy P. Compio
DAKO ang kalipay sa mga lumad nga nakadawat sila og pinaskohan gikan sa lokal nga panggamhanan sa Tagum City.
Moihap sa kapin 1,000 ka mga lumad ubos sa tribong Ata-Manovu sa Davao del Norte ang nakadawat sa pinaskohan Disyembre 25, 2021.
Dunay sud nga mga grocery ang mga food packs nga nadawat sa mga lumad gikan sa Talaingod, Kapalong ug Sto. Tomas.
Midalit sab og libreng transportasyon ang LGU-Tagum sa mga lumad balik ngadto sa ilang lugar.
Naandan na sa mga indigenous peoples ang mamasko matag holiday season dili lang sa Davao del Norte apan bisan sa Davao City.
Sa miaging mga tuig, ang mga lumad magpanon sa siyudad sa Davao, apan karon pipila nalang kanila ang milugsong gumikan gihatod na sa LGU-Davao ang ilang mga pinaskohan sa ilang mga barangay didto sa kabukiran.
