P5K nga financial assistance itunol sa Cebu City matag panimalay
Mohatag ang Siyudad sa Sugbo og tag P5,000 nga financial assistance matag panimalay nga naapektuhan sa bagyong Odette.
Nadanyos ba sa kinatibuk-an o tipik lang sa balay ug bisan pila pa ka pamilya ang nagpuyo, sama ra ang ayuda nga ihatag.
Mao kini ang gitataw ni Cebu City Councilor Raymond Alvin Garcia, chairman sa committee on budget and finance sa Konseho sa Dakbayan sa Sugbo sa press conference sa Disyembre 23.
Nipasabot si Garcia nga tumong niini nga ilang maaporan ang 110,000 ngadto sa 115,000 ka mga panimalay sa gahin nga P600 milyunes nga pundo nga gikuha gikan sa calamity fund.
“They will have to share the P5,000,” pasabot ni Garcia.
Ang P600 milyunes tipik na sa P1 billion nga giaprobahan nga gahin sa Konseho alang sa mga galastuhan sa Siyudad, labina sa pag-abag sa mga biktima sa bagyo.
Giklaro usab ni Garcia nga ilang prayoridad ang “poorest of the poor” sa pag-apod-apod sa hinabang pinansyal busa nangayo siya sa pagsabot sa mga nagpuyo og subdivision nga di sila maapil.
Ang Department of Social Welfare and Services (DSWS) ug Cebu City Disaster Risk Reduction and Management Council (CDRRMC) ang magtambayayong sa pag-assess sa mga mang-apply alang sa ayuda.
Matod ni Garcia nga wa silay gitakdang kadugayon kanus-a mahatag, apan iyang gipaneguro nga kon makompleto dayon ang form sa beneficiary, itunol gilayon nila ang ayuda.
Gibana-bana sa Siyudad nga P1.7 bilyunes ang kadaut sa kabalayan nga namugna sa bagyong Odette nga niigo sa isla sa Sugbo sa gabii sa Disyembre 16.
Labing minos 16 ang nangamatay, kasagaran natumbahan sa kahoy, firewall ug mga debris.
Ang Odette giisip nga labing kusog nga bagyo nga niigo sa Kabisay-an human sa bagyong Yolanda.
Minos ang kinabuhi nga nakalas sa Odette tungod sa preventive evacuation niadtong mga nagpuyo sa baybayon, daplin sa kasapaan ug niadtong kanunay maigo sa landslide. (REV)
