Editoryal: Bug-at nga silot
Basta dunay katalagman, naa gyud ang krisis sa tubig, pagkaon, fuel ug uban pa kay kini gasalig sagad sa supply sa elektrisidad. Kon way elektrisidad, way produksyon ug kon naa man, limitado ug hinay.
Duna say mapahimuslanon nga mga tawo, mga oportunista nga mamiktima sa yanong mga tawo. Sama aning mga mamaligyaay og mahal kaayong litro sa gasolina ug botelya sa tubig nga unta naglisod ang katawhan, bunalan pa sa mahal kaayong presyo.
Dunay mga tawo nga namaligya og tag P120 paibabaw sa matag litro sa gasolina. Naay mga nagtingkagol na sa prisohan. Duna say mga gas station nga grabeng nakapresyo sa ilang produkto, namaligya og tag P90 matag litro.
Naa say namaligya og tubig sa tag P60 ang 500ml. kun tunga sa litro. Grabe ang ambak, gikan sa tag P12-P15 ngadto sa P60. Labing minos P45 ang ambak sa presyo, di ba?
Sa mga krisis, makita gyud ang tinud-anay nga matang sa pagkatawo sa usa ka tawo. Dinhi makita ang karakter sa mga tawo mga mapahimudsanon nga ang kahakog ug kadawo maoy nagpatigbabaw. Inay motabang ug mopasawo sa ilang resources nga gikinahanglan kaayo sa pag-survive sa komunidad, ila na hinuon kining ginudnod.
Kon dunay mga establisemento nga mapahimudsanon, kon mahibalik na sa normal nga kahimtang ang sitwasyon karon, angay nang likayan, di na palitan o kan-an. Mao ni ang angay nga ipahamtang sa publiko sa mga nanag-iya niini.
Mas maayo kon pasakaan og kaso kining mga tawhana ug mga establisemento sa ilang pagpasobra og maayo sa presyo sa mahinungdanon kaayong mga produkto.
Kon kuwang ang kabug-aton sa balaud aning magpatuyang sa pagpaumento sa presyo, kinahanglang ipalabang ang balaudnon nga magpahamtang og bug-at nga silot panahon sa matag dunay kalamidad aron mangahadlok ang mga opurtunista.
