TNT, Meralco magkombati
Mga duwa karon:
3:00 pm- Alaska
batok Blackwater
6:00 pm- Talk N’ Text
batok Meralco
Magkrus ang dalan sa magsuong puwersa sa Talk N’ Text Tropang Giga ug Meralco Bolts sa main game karong alas 6:00 sa gabii sa 2021 Philippine Basketball Association (PBA) Governor’s Cup conference sa Smart-Araneta Coliseum.
Ang Bolts adunay 1 – 0 nga rekord samtang ang Tropang Giga naggunit og 1-1 nga baraha.
Nanghinaot ang Bolts nga masumpayan ang maayo nilang gipakitang duwa sa premiro nilang tahas diin ilang gipanglampornas ang Blackwater Bossing, 98-77.
Kini maoy katapusang duwa sa Bolts sa 2021 ug gusto nilang mobiya sa kasamtangang tuig nga adunay taas nga moral.
Sa premiro niyang duwa sa Bolts, ang import nga si Tony Bishop nipakatap og 28 puntos ug 13 rebounds.
“He can shoot from the perimeter and get points inside and more importantly, he rebounded the basketball and blocked some shots defensively,” matod ni Meralco coach Norman Black kabahin kang Bishop nga napatik sa www.pba.ph.
Naglaom og dako si Black sa ilang kampanya ubos sa pagpangulo ni Bishop.
“He has a lot of versatility in his game, an all-around player. I don’t think he’s the give-him-the-ball, get-out-of-the-way type of player but he fits well with what we do in terms of ball movement and player movement,” dugay paghulagway ni Black kang Bishop.
Si Tropang Giga coach Chot Reyes niangkon nga naglisod pa sila sa pag-adjust sa ilang duwa kauban ang ilang import nga si McKenzie Moore.
“We really expected to struggle in our first few games because we haven’t played any tune-up or practice game with Mac (Moore), Gab (Banal) and the new guys prior to the tournament debut. We have to be patient,” batbat ni Reyes.
Ang Tropang Giga nasubhan og 102-100 nga kapildihan batok sa NLEX Road Warriors unya nibangon sila pinaagi sa pagbuntog sa Alaska Aces, 81-77.
Sa premirong duwa, magsangka ang Alaska ug Blackwater sugod karong alas 3:00 sa hapon.
Ang Aces adunay 2-2 nga rekord samtang ang Bossing wala pa nakatilaw og daog sulod sa upat ka mga duwa.
Nanghinaot si Bossing coach Ariel Vanguardia nga naka-adjust na sa usa’g usa ang iyang mga magduduwa aron maangkon na nila ang maidlas nga kadaugan.
“Sana mas sanay na sila sa minutes nila, hindi na sila nagugulat,” matod ni Vanguardia.
“Based on our practices naman tingin ko mas ready na sila kaysa before.” (ESL)
