Mga hari miyukbo sa Warriors
Nagpakatap og 30 puntos si Stephen Curry aron agakon ang hosts Golden State Warriors sa kadaugan batok sa Sacramento Kings, 113-98, kagahapon, Disyembre 21, 2021 (RP time) sa National Basketball Association (NBA) 2021-22 season.
Ning sangkaa, gisaulog sa mga sumosunod sa Warriors sa labing unang higayon ang naposteng kasaysayan ni Curry sa pagbuak niya sa 10 ka mga tuig nga rekord ni basketball legend Ray Allen sa padaghanay og napasulod nga three-point shots sa kinatibuk-an.
Sa 1st quarter, adunay video tribute sa mga highlight sa two-time MVP.
Si Draymond Green mikawat sab og atensyon human niya giposte ang iyang ika-31 nga triple-double nga maoy labing daghang nahimo sa usa ka sakop sa Warriors. Nimugna si Green og 16 puntos, 11 rebounds ug 10 assists.
Ang Warriors, nga ningsaka sa 25-6 nga rekord – ikaduha sa Western Conference – ningpabulhot sa ilang opensa sa 4th quarter aron payukbuon ang Kings.
“The bench was great. Every guy who came off the bench played well for us,” matod ni Warriors coach Steve Kerr.
Ningkombati ang Warriors nga wala ang duha sa ilang mga sinaligan nga sila si Andrew Wiggins ug Jordan Poole apan natapakan kining maong haw-ang sa panagtambayayong sa ilang mga magduduwa.
Ang Kings, nga nahagbong sa 13-19 nga rekord, gipangulohan ni Tyrese Haliburton pinaagi sa iyang 24 puntos ug 11 rebounds, niamot og 19 puntos ang kanhi sakop sa Warriors nga si Harrison Barnes samtang nitunol og 18 puntos si Buddy Hield. (AP)
