19,473 nabakunahan sa CHD sa 3 ka adlaw; Robinsons labing unang mibukas
By Roger Vallena
ANG Cebu City Government nakabakuna og 19,473 ka mga individual batok sa Covid-19 sa nakalabay nga tulo ka mga adlaw, kun gikan sa Disyembre 27-29, pahibawo ni Dr. Jeffrey Ibones sa Huwebes, Disyembre 30, 2021.
Si Ibones, pangulo sa Cebu City Health Department nibutyag nga moabot sa 7,749 ang nabakunahan sa Disyembre 27. Mokabat sa 96 ang 1st dose samtang 7,653 ang 2nd dose.
Sa Disyembre 28, moabot og 6,163. Sa 1st dose, 106 ang nagpabakuna, samtang 6,054 ang 2nd dose ingon man tulo ang nagpa booster.
Mokabat usab sa 5,525 ang nabakunahan sa Disyembre 29, diin 48 ang first dose, 5,466 ang 2nd dose ug 11 ang nagpa booster.
Bukas nga mga vaccination site sa Disyembre 31 naglangkob sa Robinsons Galleria, SM City, SM Seaside, Cybergate, Iconique, Cebu City Hall samtang ang pop-up sites naglangkob sa Pardo Elementary School Brgy. Tinago Gym, Tejero Gym, Quiot Gym, Basak San Nicolas Shopwise, ug Talamban Elementary School.
Sa Enero 3, langkuban kini sa Robinsons Galleria, SM City, SM Seaside, Cybergate, Iconique samtang pop up sites mao ang Pulang Bato Gym, Brgy. Luz Sitio Calinao Gym, Talamban Elementary School ug Cebu City Hall.
ROBINSONS
Lima ka adlaw human sa bagyong Odette, gibuksan dayon og balik sa Robinsons niadtong Disyembre 21 ang ilang duha ka vaccination sites sa Covid-19: Robinsons Galleria ug Cybergate sa Fuente Osmena, alang sa second dose.
Ang Galleria vaccination site alang lang sa mga nag-edad og 18 anyos pataas samtang sa Cybergate alang lang sa pediatrics kun mga nag-edad og 12-17 anyos.
Sukad sa ilang pagbukas, mag average og tag 1,300 ang mabakunahan sa mga hamtong sa Galleria samtang 800 sa pedia ang average kada adlaw sa Cybergate, matod ni May Adolfo, operations director sa Robinsons Land Corporation, Commercial Centers Division.
Matod ni Adolfo nga ilang nakita ang panginahanglan sa pagdapat sa second dose sa Covid-19 vaccination human dunay mga tawo nga nangutana kanus-a sila mobukas og balik.
“We understand the need for protection against covid-19 and in doing our part to help stop the spread. Several customers due for vaccination have reached out to us asking for the schedule of vaccination in the mall,” matod ni Adolfo.
Tungod niini, ilang giplano ang pagbukas sa duha ka vaccination sites tungod kay nasayod sila nga daghan ang wa mahatagi sa second dose tungod sa grabeng kadaut nga gimugna sa bagyong Odette.
Human sa bagyo, gimando gilayon ni Mayor Michael Rama ang pagsuspenso sa vaccination drive aron maka-focus sa relief operations.
Matod ni Adolfo nga sa wa pa sila mobukas, nakig coordinate una sila kang Dr. Jeffrey Ibones, pangu sa City Health Department ug sa City Hall, sa ilang plano.
“Despite the challeges brought by Typhoon Odette, we immediately made sure site is ready and energized in Dec 21, 2021 in coordination with the team of Dr. Jeffrey Ibones. We continue to manifest our support to LGU, City Health and DOH vaccination drive,” dugang ni Adolfo.
Bukas sila sa Biyernes, Disyembre 31, apan sirado sila sa Enero 1 ug mobalik ang ilang pagpamakuna sa Lunes na, Enero 3, 2021.
Kay wa man silay kuryente sa bag-o pa tungod sa pagkaputol sa mga wire, nigamit sila og generator sets.
Hinuon, gamay ra ang namugna nga kadaut sa bagyong Odette sa ilang mga edipisyo busa nibukas gilayon ang Galleria alang sa mga kustomer sa Disyembre 17, kun pagkaugma human sa pagkuso-kuso sa bagyong Odette.
Nitanyag gilayon sila og libreng charging, libreng wifi ug libreng parking ngadto sa publiko.
Samtang Ang CHD naghinayhinay na sa pagbukas sa mga vaccination site samtang si Ibones nagsusi sa mga dapit nga mahimong makapadayon na sa pagpamakuna.
Gawas sa city hall grounds, ang city health nibukas og pop up vaccination site sa Pardo Elementary School sugod sa Lunes, Disyembre 27.
