Philippine Fleet mipakatap og 28 ka barko alang sa HADR sa Vis-Min
GIPAKATAP sa Philippine Fleet sa Philippine Navy ang ilang 28 ka mga barko alang sa humanitarian and disaster relief (HADR) operations sa mga dapit sa Kabisay-an ug Mindanao nga naigo og maayo sa bagyong Odette.
Ang mga barko nga gigamit sa gitawag og TABANG Cebu, Leyte Surigao and Palawan Operations, nagkarga og care packs, ubang supplies ug mga ekipo.
Dinhi sa Sugbo, niabot ang upat ka mga barko nga gilangkuban sa BRP Tausug (LC-295), BRP Enrique Jurado (PC-371), BRP Abraham Campo (PC-396), ug ACS-700.
“These essential items need to reach the super typhoon-battered areas with utmost urgency. We need to ensure that the relief, recovery and rehabilitation processes of this operation will not be hampered,” matod ni Rear Admiral Alberto Carlos, commander sa Philippine Fleet.
Matod sa Philippine Fleet, sa ilang Facebook post, way hunong ang ilang mga barko sa pagpahigayon og “logistics-run” sa nakalabay nga mga adlaw aron mahatagan gilayon ang mga dapit nga apektado sa bagyo sa ilang mga panginahanglan, labina sa tubig ug pagkaon nga nihit kaayo.
Gawas sa pagdala og mga batakang panginahanglan, supplies ug mga ekipo, ang mga barko makapasakay usab og mga tawo nga nangatanggong sa bagyo.
Gi-repurposed usab sa PN ang Presidential ship, BRP Ang Pangulo (ACS 25), ngadto sa usa ka floating hospital nga dunay 10 bed-capacity alang sa mga dapit sa Mindanao nga naigo sa bagyo.
Alang kini sa mga tawo nga nanginahanglan og medical attention.(REV)
