Lalaki nagpakamatay kay di andam magminyo
WA NAY kinabuhing napalgan ang usa ka ulitawo nga nag-unay paghunos sa iyang kinabuhi didto sa Purok 2-A, Barangay Poblacion, Monkayo, Davao de Oro alas 4 sa hapon, niadtong Sabado, Disyembre 25, 2021.
Ang biktima mao si Marlon (bansagon gitago), 20, ulitawo, walay trabaho nga taga Purok Guijo, Barangay Banlag, Monkayo ug kasamtangang nanimuyo sa nahisgutang dapit.
Subay sa report, ang iyaan sa biktima nga si Maricel, 34, personal nga mitaho sa Monkayo Municipal Police Station ug maoy mitaho kabahin sa maong insidente.
Matud pa nga ang biktima unang nadeskubrihan sa 9-anyos nga anak ni Maricel.
Gidala ang biktima sa Municipal Health Office pinaagi sa mga personahe sa Municipal Disaster Risk Reduction Management, apan gideklarang patay sa Municipal Health officer nga si Dra. Olivia Labanan Cerbo.
Gisaysay ni Maricel nga napalgan ang usa ka butang nga maoy gigamit sa paghunos sa kinabuhi sa biktima.
Dugang gibutyag ni Maricel nga ang biktima nga iyang pag-umangkon miadto sa balay sa girlfriend niini nga ginganla’g Jodelyn nga nahimutang sa Cervantes Street, Poblacion, Monkayo dihang matud pa naabtan sa igsoong lalaki sa babaye.
Ang biktima sumala pa misumbong nga naghilak sa iyaan niini nga siya gihulgang patyon sa igsoon sa girlfriend niini sa higayon nga siya mopalayo.
Giingon nga pila ka bulan ang milabay ang girlfriend sa biktima nag-post sa Facebook nga kini nagsabak apan, nasuta nga negative pinaagi sa pregnancy test.
Nasayran nga di pa andam mangasawa ang biktima sanglit wala pa kini trabaho.
Ang patayng lawas sa biktima gipahiluna sa Lord Anthony Funeral Homes.
