Cebu City naigo sa ikatulong sunog sukad sa Pasko
LAIN na sab nga sunog ang niigo sa Dakbayan sa Sugbo sukad sa pag-igo sa Bagyong Odette, diin kadaghanan sa mga panimalay naggamit lang og kandila ug uban pang suga nga nagsalig sa lana kay wa pay kuryente.
Ang naigo sa sunog sa mga alas 2 sa kaadlawon sa Lunes, Disyembre 27, mao ang Sityo Ipil-Ipil, Barangay Capitol Site.
Ang sunog niugdaw sa 27 ka mga balay ug nagbilin og labing minos P1.6 milyunes nga danyos ug niangol sa duha ka mga tawo.
Giila ni SFO1 Riza Vulve sa Cebu City Fire Office (CCFO) ang mga angol nga sila si Eleazar Montimeyor, 24, kinsa nasamad ang tuo nga kuyamoy sa tiil, ug si FO1 Ariel Jay Toron, 27, kinsa nasamad sa tuo nga palad.
Si Julve niingon nga ang sunog nakaapekto sa 35 ka mga pamilya.
Unang alarma ilang nadawat sa mga alas 2:01 sa kaadlawon.
Sa Disyembre 25, Pasko, naigo sa sunog ang sityo Mansanitas, Brgy. Tisa, diin usa ka 25 anyos nga lalake ang namatay.
Sunod nga naigo sa sunog samang adlaw mao ang residential ug balay patigayon sa dan Urgello, Brgy. Sambag 2./REV
