Beermen, Katropa gabawon og daog
By Erwin Lirazan
PAREHONG gituldokan og kadaugan sa San Miguel Beermen ug Talk N’ Text (TNT) Tropang Giga ang mga aksyon sa Philippine Basketball Association (PBA) Governor’s Cup sa 2021.
Ang Beermen ninghubog sa Terrafirma Dyip, 100-86, samtang makutas nga kadaugan ang nahimo sa KaTropa batok sa Rain or Shine Elasto Painters niadtong Dominggo, Disyembre 26, 2021 sa Smart-Araneta Coliseum.
Ang Beermen ningrehistro sa ilang ikatulong sunodsunod nga kadaugan human nila nasugdan ang komperensya og duha ka sunodsunod nga kapildihan.
Gipangulohan nila ni Terence Romeo ug import Brandon Brown ang Beermen pinaagi sa ilang 23 puntos matag usa samtang nidugang og 17 puntos si CJ Perez.
Pagsugod pa lang, kontrolado na sa Beermen ang kombati ug wala nila tugoti nga makapanghudlat ang Dyip, nga nadusmo sa 1-4 nga rekord.
“We made a lot of sacrifices during the holidays because we were down, 0-2, and it’s hard to climb back from that with most of the teams preparing hard,” asoy pa ni Beermen coach Leo Austria nga napatik sa www.pba.ph.
“I commend the players for recognizing the importance of our next games after we lost two consecutive and doing something about it.”
Ang Dyip gipangulohan ni Juami Tiongson pinaagi sa iyang 21 puntos samtang nidugang og 19 puntos si import Antonio Hester.
Sa laing duwa, kuyaw nga nakaduwa ang rookie nga si Mickey Williams ug nagpauwan kini’g 25 puntos lakip na niini ang upat ka three-point shots aron pangulohan ang Tropang Giga.
Nidugang og 18 puntos ang Sugboanong si Roger Pogoy, nihatag og 15 puntos si Poy Erram samtang niamot og 13 puntos si import Aaron Fuller.
Ang Tropang Giga miposte sa labing una nilang daog sulod sa tulo ka mga duwa samtang nahagbong sa 2-2 nga rekord ang Elasto Painters.
Puntos matag usa:
1st game
TNT (95) – M. Williams 25, Pogoy 18, Erram 15, Fuller 13, Reyes 11, Castro 11, K. Williams 2
Rain or Shine (92) – Walker 32, Mocon 13, Ponferada 12, Belga 11, Nambatac 9, Norwood 6, Asistio 5, Santillan 3, Caracut 1.
2nd game:
San Miguel Beer (100) – Romeo 23, Brown 23, Perez 17, Manuel 14, Fajardo 11, Lassiter 8, Enciso 2, Tautuaa 2.
Terrafirma (88) – Tiongson 21, Hester 19, Calvo 9, Daquioag 8, Cahilig 7, Ramos 7, Gabayni 4, Camson 4, Pascual 4, Rosser 3, Batiller 2.