Driver sa garbage truck sa barangay napiit, patay
Usa ka senior citizen nga drayber sa garbage truck sa Barangay Sambag 1, siyudad sa Sugbo patay human naipit dihang nibangga sa laing garbage truck.
Si Police Corporal Niño Dela Torre sa Abellana Police Station, imbestigador, niila sa namatay nga si Ildefonso Magdasal, 60, ug molopyo sa Gil Tormis St., Barangay Sambag 1.
Matod ni Dela Torre nga sila gipahibalo sa barangay kapitan sa Sambag 1 nga si Magdasal patay na nga miabot sa tambalanan.
Sa imbestigasyon sa kapulisan nasayran nga pasado ala una sa hapon niadtong Martes, Disyembre 21, sa Sityo Locunta sa nahisgutang barangay, sila si Magdasal ug mga kauban niini samtang nangolekta og basura sa lugar, kalit miatras.
“Ang brake sa maong truck gi-hang ug dayon iyang gi-start sa ilang pag lakaw mao to nga ming atras,” matod ni Dela Torre.
Ang truck sa basurahan miatras ug nibangga sa laing truck nga niresulta sa pagkaipit ni Magdasal sa manubela ug hinungdan sa iyang kamatayon.
“Nangabuak ang samin sa truck tungod siguro sa ka kusog sa impak sa pagkabangga,” dugang ni Dela Torre sa Superbalita Cebu kagahapon. (BBT)