Mogamit torotot pagsugat sa Bag-ong Tuig gipasidan-an
By Ralph Lawrence G. Llemit
USA ka opisyal gikan sa Davao City Covid-19 Task Force ang nagpasidaan sa mga Dabawenyo sa paggamit og torotot sa pagsugat sa Bag-ong Tuig kay posibleng makakatap kini og mga lagdo (droplets) nga nagdala og kagaw sa Covid-19.
Gikanayon ni Covid-19 Task Force Spokesperson Dr. Michelle Schlosser sa paghinabi kaniya sa 87.5 FM Davao City Disaster Radio niadtong Miyerkules, Disyembre 29, 2021, nga ang paggamit og torotot maoy hinungdan sa lagdo nga mao say rason sa kagaw nga mokatap kay molupad kini sa hangin sa tawo nga naa sa atubangan sa torotot.
Matud ni Schlosser nga ang pagpalit og torotot risgo sab kay basin og duna na say laing tawo nga mihuyop niini.
“This is a risky activity. Kung mopalit ka’g torotot tas i-try nimo, kanang dili ka kaila kung kinsa ni-try atong torotot na gipalit nimo. Obvious answer siya nga, health wise, dili siya safe sa katawhan. Dili siya hygienic,” ang tigpamaba nagsulti.
Gitambagan ni Schlossser ang mga Pinoy nga mogamit og laing alternatibo sa pagsugat sa Bag-ong Tuig 2022.
“Dagha’g ways to celebrate or make noise without spreading droplets. I hope maging mas creative ang mga tao this time,” sigon niya.
Giklaro sa opisyal nga wala gidid-an ang mga namaligya og torotot sa pagbaligya niini kay mao kini ang ilang tinubdan sa panginabuhi. Apan kini ubos sa pagpili sa mopalit o mogamit nga mag-amping sa paggamit niini.
Samtang si Mayor Sara Duterte-Carpio nagpasidaan sab sa mga Dabawenyos nga padayon nga mag-obserba sa minimum health protocols, ilabi na atol sa tigum, kay posibleng makatampo kini sa posibleng pagsutoy unay sa mga kaso sa 2022.
Matud niya nga ang hulga sa Omicron variant posibleng makapundo og mga kaso sa sunod tuig.
“The surge will be fueled by the Christmas gatherings nagapanghitabo all over the city, and the Omicron variant,” pasidaan ni Duterte-Carpio.
Sumala sa datus sa Department of Health sukad Disyembre 28, ang Davao City nakatala lang og duha ka bag-ong kaso, nga nagdala sa kinatibuk-ang aktibong kaso ngadto sa 59.
Samtang ang Covid-19 positivity rate sa siyudad nagpabilin nga ubos kaayo sa 0.3 porsiyento sukad niadtong Disyembre 26, sumala sa opisyal sa Davao City Covid-19 Task Force.
