Casimero pabiling kampyon
Magpabiling world champion si Filipino Johnriel “Quadro Alas” Casimero.
Kagahapon, Disyembre 23, 2021, opisyal nga gianunsyo sa World Boxing Organization (WBO) nga dili nila tangtangan sa iyang bantamweight world title si Casimero.
Ang lumad nga taga Ormoc nakatakda untang modepensa sa iyang kampyunato niadtong Disyembre 11, 2021 sa Dubai batok sa mandatory challenger niini nga si British Paul Butler.
Apan sa wala damha, wala nitunga si Casimero sa official weigh-in ug nasayran nga nahidangat kini sa ospital tungod sa sakit nga gastritis.
Ang WBO nimando sa kampo ni Casimero nga magpakita og medical certificate nga magpamatuod nga nasakit siya sulod sa 10 ka mga adlaw.
Gitataw sa WBO nga kon dili makapakita og medical certificate ang 32 anyos nga boksidor, hayan ilaha kining tangtangan og bakus.
Gituman sa kampo ni Casimero ang mando sa WBO ug nakuntento ang world boxing body.
“There is no controversy as to the cause of Casimero’s physical impediment to engaging in the WBO Bantamweight Mandatory Championship Bout against Paul Butler per the medical documents furnished to the WBO. In essence, all the supportive evidence concluded that Casimero’s diagnosis was Viral Gastritis,” tipik sa resulosyon nga gipagawas sa WBO kabahin sa ilang desisyon.
“Furthermore, these findings were rendered by duly licensed physicians and certified by the respective medical institutions. Therefore, we deem it unnecessary to challenge these findings through independent medical reviews.”
Sa laing bahin, gihatagan sa WBO og 15 ka mga adlaw nga tagal ang bag-ong promotional outfit nga Probellum sa pagdesisyon kon ilaha bang i-eskedyul og balik ang away nila ni Casimero ug Butler. (ESL)
