Editoryal: Mas kuyaw kay sa Odette
Samtang nagsangkiig ang Sugbo ug ubang mga dapit sa Kabisay-an ug Northern Mindanao sa grabeng epekto sa bagyong Odette, ang ubang mga dapit sa nasod, labina sa Metro Manila, nagbantay nga di kaayo makakatap ang Omicron, bag-ong variant sa Covid-19.
Naa na may tulo ka mga kaso sa Omicron, apan wa pa makatakod og laing mga tawo kon basehan ang sulti sa Department of Health (DOH).
Human makabangon ang Sugbo ug mabalik sa normal ang kinabuhi sa mga Sugboanon, kuyaw nga mahigmata na lang kita nga nagsugod na og katap ang Omicron nga mas grabe ka mananakod kon itandi sa Delta variant. Doblehon ug katuluhon ang kapaspas niini sa pagpanakod.
Matod sa World Health Organization (WHO) nga sud sa 48 oras, ang tawo nga mataptan magpakita na dayon og simtomas ug kini timailhan sa iyang pagkamananakod.
Ang nakakuyaw ani nga variant kay bisan ang kadtong nasakit na og coronavirus disease 2019 (Covid-19) mataptan gihapon. Apil sa matakdan mao ang mga bakunado. Matod sa mga health expert nga tungod sa Omicron, ang tawo nga nabakunahan na og kaduha di na maisip nga fully-vaccinated.
Bisan pa ini nga kapaspas sa Omicron manakod ug bisan ang bakunado nataptan, ang bakuna mao gihapon ang ilang girekomendar nga epektibong panagang aron di mograbe ang epekto sa imong lawas kon ikaw mataptan.
Gikan sa Estados Unidos, Europe ngadto sa Africa ug ubang mga nasod sa Asya, nagkapuliki sa pagpangandam ang mga kagamhanan. Duna na gani mga dapit sa Canada nga nagkapuliki sa pag-andam sa ilang health facilities.
Makabangon ra kita sa epekto sa bagyo. Kon mobalik na ang kuryente, ang suliran sa tubig, pagkaon, gasolina ug telecommunication mahibalik ra.
Apan ang epekto sa laing surge sa Covid mas kuyaw, mas lapad lawom kaayo ang epekto. Maglikay ug mangandam ta.
