Lakers gihubsan sa Suns
Pito ka mga sakop sa Phoenix Suns ang ningmugna og dobleng numero nga mga puntos pinangulohan sa 24 ni Devin Booker aron makmakon ang hosts Los Angeles Lakers, 108-90, kagahapon, Disyembre 22, 2021 (RP time) sa National Basketball Association (NBA) 2021-22 season.
Ang ubang mga magduduwa sa Suns nga nakaposte og dobleng numero nga mga puntos mao sila si Deandre Ayton (19), Mikal Bridges (14), Cameron Johnson (14), Chris Paul (11), JaVale McGee (10) ug Cameron Payne (10).
Sa kadaugan, napahugtan og gamay sa Suns ang ilang paggunit sa overall leadership dala ang 25-5 nga rekord samtang ang Lakers ningdakin-as sa 16-16 nga baraha.
Ang Lakers gipangulohan ni LeBron James pinaagi sa iyang 34 puntos, niamot og 22 puntos si Russell Westbrook samtang nidugang og 12 puntos si Trevor Ariza. Human sa sikit nga kombati sa 1st half, ang Suns nanginit ug nakaposte kini’g 12 puntos nga labaw, 85-73, human sa 3rd quarter.
Nagpadayon ang kainit sa Suns sa 4th quarter hangtod nga nainat ang ilang labaw ngadto sa 22 puntos ug wala na sila molingi pagbalik. (AP)