Diputado: “Buhat ang pasultion” - SunStar

Diputado: “Buhat ang pasultion”

By Salvador Diputado

TUNGOD sa mga katalagman, mogawas gyod ang mga maayong kinaiya sa mga namunoan karon. Dunay uban nga magpunay lang og reklamo sa dili nila mahimo, sama sa wala na gyoy paglaom pa. Imbes molihok og mangita og paagi pagsulbad sa usa ka problema, ang uban magsigi lang og yawyaw ug magreklamo nga hopeless na ang tanan.

Pero ang uban, imbes magsigi og tagawtaw, mangita gyod og mga paagi pagsulbad sa problema. Matod pa, buhat ang pasultion.

Mao kining mga klaseha sa mga lider nga maoy manguna og lihok, maoy manguna sa paghatag og inspirasyon sa mga katawhan nga dili magpakawala sa pagsalig kay adunay kasulbaran ang tanan.

Mao kining mga klaseha sa mga lider nga kasagaran maoy una nga makabangon sa kalisod. Ug kasagaran nga mahitabo, maoy una nga makadawat og ayuda gikan sa gawas o sa kaulohan sanglit dali man makadapit sa pagtagad ang ilang gihimo. Nindot sila himoan og halapad nga coverage sanglit makahatag man kini og inspirasyon sa uban nga susama og kahimtang.

Tinuod ang giingon nga sa katalagman, mogawas gyod ang tinuod nga pagka-tawo sa usa ka lider.

Dunay usa ka gobernador nga busog pirmi ang panghambog, sama sa puno pirmi ang utok sa solusyon sa tanang problema. Kusog mohatag sa iyang mga hunahuna sama sa aduna siyay solusyon sa kada problema nga moabot sa kinabuhi.

Apan sa dihang miabot ang COVID sa nasod, ang kanunay nga mogawas sa iyang baba mao ang pagreklamo ang kulang ang kwarta, kulang ang mga kagamitan sa probinsiya maong kinahanglan nga mangutang para dunay magasto.

Naputos og utang ang probinsiya sanglit tanang mga panginahanglan pangutang ra man ang nahibaw-an.

Misamot ang problema sa dihang mihapak si Odette og mihatag og tumang kadaot sa mga lugar nga maagian niini. Hilabihan kabangis si Odette og walay gipasaylo sa mga lugar o mga katawhan nga mahiagom sa iyang kabangis.

Paspas pas kilat ang maong gobernador sa pagsulti nga walay kwarta ang probinsiya ug dali kaayo naka-imbento og pangwarta. Mangayo sa mga katawhan og kwarta, cash gyod, aron itabang sa mga naigo sa bagyo nga Odette.

Ang gikatingad-an sa katawhan kay hilabihan kadako sa giutang sa mga bangko aron kunohay tabangan ang katawhan sa kalisod sa pagkaon, tubig ug uban pa. Apan nganong walay kwarta ang probinsiya nga dako man unta ang kantidad nga giutang?

Gawas pa niini, daghan man ang mihatag sa ilang donasyon ug tabang nga kantidad para sa nahiagom sa katalagman, asa man diay paingon ang maong mga kwarta?

Gibulsa na pod para sa piniliay sunod tuig?

Dunay dakong problema ang usa ka gobernador. Mona-mona intawon niya og pangita og paagi nga makaduol ni Inday Sara, human mo-withdraw si Senador Bong Go sa iyang kandidatora pagka-presidente.

Gusto sa maong gobernador nga siya maoy modala ni Inday Sara sa iyang probinsiya. Ang naka-anghit lang kay ang iyang kontra nga kandidato maoy giduol ni Inday Sara sa dihang mipadala og tabang si Inday Sara ngadto sa maong probinsiya.

Leave a Reply

Your email address will not be published.